Dağıstanın Botlix rayonunda baş verən qaya uçqunu Çeçenistan Respublikasının sərhədindən Arakan meydançasına gedən yolda hərəkəti tamamilə bağlayıb. Hazırda nəqliyyat yalnız 29-cu kilometrədək hərəkət edə bilir. Hadisə yerindən yayılan videolara  əsasən, iri qaya parçaları yolun üzərinə düşüb. Yolun sabah günortadan sonra açılması planlaşdırılır.

Dağıstan hökumətinin məlumatına görə, respublika üzrə doqquz avtomobil yolu bağlı qalır, daha 18 yolda isə müvəqqəti dolama yollar təşkil olunub.

   Levaşi - Akuşa - Urkarax - Madjalıs - Mamedqala avtomobil yolunun 54-cü kilometrində torpaq sürüşməsi baş verib. Ekskavatorlar yolu daş və palçıqdan təmizləyir. Müvəqqəti hərəkət sxeminin 21 aprelə qədər təşkil olunacağı bildirilir. Bu yolun Kunkı kəndinə gedən hissəsində körpü dağılıb. Kardukotti çayı üzərindən müvəqqəti keçid tikilir.

Altı yaşayış məntəqəsi ilə nəqliyyat əlaqəsi kəsilib.

   Xatırladaq ki, Dağıstan anomal yağıntılar səbəbindən genişmiqyaslı daşqınlarla üzləşib. Şəhər və dağ rayonlarında torpaq sürüşmələri baş verib. Bu günə olan məlumata görə, müvəqqəti yerləşdirmə məntəqələrində 544 nəfər qalmaqdadır.