Сифте яз чи эдебиятдиз «лирика» гаф ХХ асирдин 30-йисара атана. А гаф кардик кутадалди чна «мажави» гафуникай менфят къачунва. Чи тIвар-ван авай алим Гьажибег Гьажибегова 1928-йисан 22-мартдиз «Яру Дагъустан» газетда чап хьайи вичин «Шаир Етим Эмин» макъалада «мажави» «лирика» тирди къалурнава. 1936-1938-йисарин лезги эдебиятда чал «лирика» гаф гьалтзава.
***
Етим Эминан шиирар виридалайни кIвенкIве кIватIна къелемдиз къачурди ва адаз сифте гаф кхьейди Гьумаят тIвар алай лезги дишегьли я. Ам Вини Къартасрин (гилан СтIал Сулейманан райондик акатзава) хуьряй тир. А девирдин сейли алимрикай яз гьисабзавай Салигь Эфендидин свас тир Гьумаята чи чIехи шаирдин шиирар гьижридин 1292-йисуз (1876) къелемдиз къачунва. Гьумаята вичини шиирар кхьизвай ва адан бязи шиирар къедалди халкьдин меце амазма.
