Алатай асирдин 60-йисара КцIара Забит Ризванов, Лезги Нямет, Ядуллагь Шайдаев, Иззет Шерифов хьтин чи машгьур къелемэгьлийрихъ галаз санал «РикIин гаф» тIвар алай эдебиятдин кIватIал арадиз гъайи чIехи женгчи, шаир, драматург ва публицист Теймур Алиханован тIвар халкьди гьуьрметдивди кьазва. Лезги чIал ва меденият вилик тухун патал «РикIин гаф» кIватIалди чIугур женг лугьуз тежер кьван зурбади я. И женгина Теймур Алиханова кьетIен чка кьазвай.Чи машгьур шаир Забит Ризванова лагьайвал: «Теймур Алиханов кIватIалдин даях тир. Ада чи фикирар регьберрив виридалайни хъсандиз агакьардай. Серес рахунралди, жуьрэтлувилелди виридаз чешне къалурдай ада. Са гафуналди, халисан къагьриман тир Теймур!»

   1924-йисуз Къуба райондин Дигагь хуьре дидедиз хьайи, Ватандин ЧIехи дяведа иштирак авур, урус чIалан муаллимвиле кIвалахай Теймур Алиханова алатай асирдин 60-йисарин сифте кьилера Дигагьрин юкьван мектебда урус сектор ачухарнай ва гзаф аялри а секторда кIелнай. Ам кьегьал кас хьиз халкьдин рикIел хкизвай мад са кар ава. Теймур муаллимди са шумуд йисуз Къубада текдиз лезги чIалал газет акъуднай.

   ДатIана халкьдин рекье женг чIугур, 39 йиса аваз, вахтсуз рагьметдиз фейи Т.Алихановавай чан аламаз вичин эсерар чапдай акъудиз хьаначир. Адан са кьадар гъилин хатIарни квахьнай. Шаир-журналист Муьзеффер Меликмамедова сифте яз Теймур муаллимдин уьмуьрдин рекьикайни яратмишунрикай са шумуд макъала ва очерк кхьена газетризни ктабриз акъуднай. Гуьгъуьнлай «Самур» газетди женгчи шаирдикай макъалаяр ва адан са кьадар шиирар чапнай. Ингье Т.Алиханован эсерар санал кIватIна ктаб хьиз басма авун мумкин хьаначир.

   И йикъара редакциядиз атай шаирдин руша Самая Алихановади чав вичин бубадин эсеррикай туькIуьрна Москвада чапдай акъуднавай «Пакама» тIвар ганвай ктаб агакьарна. КIелдайбуру фадлай вилив хуьзвай и ктаб гьазуриз куьмек гайиди чи алакьунар авай шаир Билал Адилов я.

   Ктабда Т.Алиханован «ЦIийи инсанрин хизан», «Къекъвей рекьер», «Намус» пьесаяр, «Кереман бахт», «Дидедин веси» поэмаяр ва шиирар гьатнава. Жуьреба-жуьре темайриз талукьарнавай и эсеррай Теймур муаллимдин мурадар, экуь къамат, женгчи руьгь генани хъсандиз кьатIуз жезва.