Алатай йисуз вичин хъсан суракьар вириниз чкlай «Лекьрен муг» этнолагердин ракlарар алай гатуз аялар патал кьвед лагьай гъилера ахъа жеда. Ам Кьурагь райондин Кlирийрин хуьре, тlебиатдин гуьлуьшан чкадал алай интернатдин дараматда кардик акатда. И гъилера лагердиз 8-15 яшарин гадаярни рушар кьабулда. Абур паталди кьилди группаяр туькlуьрда. Ина пешекарри аялриз лезги чlал, чи халкьдин тарих, адетар мукьувай чирда. 

   Аялриз балкlанар гьалдай, дегь къугъунрив эгечlдай мумкинвилерни жеда. Рушариз сун гуьлуьтар, халичаяр храз, хьран фу, милли хуьрекар чраз чирда. Вахт марагълуз алудун патал музейриз ва тlебиатдин иер чкайриз экскурсияр, тlвар-ван авай шаиррихъ, алимрихъ, спортсменрихъ галаз гуьруьшар тешкилда. Этнолагерди июлдин 1-далай 21-далди, гьакlни августдин 1-далай 21-далди кlвалахда.