Хьана-хьанач Мурад тlвар алай са гада. Ам вичин бубадихъ галаз cа куьгьне дехмеда яшамиш жезвай. Гададиз гьайванар пара кlандай. Ингье хци кицl, кац кlвализ гъайила бубадиз хъел къведай, гьайванар аквадай вил авачир адаз.
Къарикай са юкъуз Мурад тавдин кlвале чими къулан патав агалтнавай. И чlавуз куьлуь са кьиф фурутI галаз катна цлан сварце чуьнуьх хьана. Свар акьван дар тир хьи, кьифревай юзаз жезвачир. Адан шуькlуь тум къецик кумай. Мурада тумуникай кьуна кьиф акъудна. Ада чlулав, керкил вилерив кичlез-кичlез гададиз килигзавай. Мурадаз кьифрен язух атана. Ада фан кlус гъвел-гъвелна вичин капашда авай кьифрез гана. Кьифре куьлуь тапацрив кlус кьуна акьван иштагьдив незвай хьи, Мурад ван алаз хъуьрена.
Пакагьан юкъуз кьиф мад хтана. И гъилера Мурада адаз къуьлуьн тварар гана.
Гьа икI, кьиф гьар вичик каш акатайла Мурадан кьилив къвезвай. Вичин руфун тухарайдалай кьулухъ амай къулуьн тварар хъуьхъвек кутуна вичин шарагриз тухузвай.
«Бубадиз кьиф акуртlа ам кулунив яна рекьидайди я», – фикирна Мурада ва цла авай свар чукlулдив чlехи авуна. «Гила ваз чуьнуьх жедай чка жеда», – лагьана ада кьифрез. Гила Мурадаз кьарай, кьифрез чими муг хьанвай.
Варз алай са йиф тир. Бубани хва верцlи ахвара авай. Садлагьана чил зурзуна, цлар сад садан винел атана. Кьуд патаз аламатдин ван чкlана. Им залзала тир.
Къван-къванцел аламачир. Куьгьне дехмедин цларни къав уьцӀена, бубани хва абурун кlаник кумай. МичIи чкада вилериз са затlни ахквазмачир абурун. Винел аватнавай цларин заланвиляй юзаз жезвачир бубадивайни хцивай.
Вучда, гьикlда? Шехьна, гьарайна лугьуз абурун ван низ къведай?
Садлагьана Мурадан кlвачел са вуч ятlани акьахна. Адаз гъвечlи тапацар гьасятда чир хьана, хвешила гьарай акъатна гададай. Ингье кьифрен кьил акахьнавай, сарарив цлай тlвек акъудиз алахънавай ам.
Са герендилай Мурадаз тIеквендай экв акуна. Килигайла пагь атlана гададин. Ана кьифер ргазвай. Абуру сарарив цал эгъуьнзавай. И кьвед чиликай хкудун патал вирида сад хьиз кIвалахзавай. Са шумуд сятдилай бубани хва кьифери эгъуьнай тlеквендай къецик акъатна. Кьифрез вичин дуст сагъдиз хкатна лугьуз гзаф хвешизвай.
