Са шумуд югъ вилик чи редакциядиз са жегьил атанвай. Вич Этибар Хидиров я лагьана чаз танишвал гайи ада рикI алаз вичин бадедикай ихтилатна. 1936-йисуз КцIар райондин СтIур хуьруьк акатзавай Илихъа дидедиз хьайи Гуьлженнет Летифан руш Хидировадин уьмуьр чIехи са ктаб я лагьана жегьилди. Яргъикек хуьруьз свас яз тухвай адаз 5 аял хьана. 40 йиса аваз гъуьл рагьметдиз фейи дишегьлиди веледар текдиз чIехи авуна. Идалай гъейри ада яран вахан кьве аялни вичин хивез къачуна. Уьмуьрди вич яцIара тунватIани зегьметди лигимарнавай и дишегьлидихъ са маса жуьредин захавал ава. РикIин дердер лагьайтIа, халкьдин баядрив элекьарда ада.

Зи дидедиз хьурай рагьмет,

Стхадизни Аллагь куьмек.

Икьван крар кьилел гъайи,

За ваз вучин, залум фелек.

Зун захъ шехьда йифиз-юкъуз,

Чlулав суруз гьикl фин лугьуз.

Сур мичlи я, экв авай туш,

Хкведай са рехъ авай туш.

Эгъвер цуьквер акъатайла

Иер жеда чи яйлахар.

Къеневай рикl акъатайтlан,

Патав къведайд амач, вахар.

Аллагьди чаз кьисметнава

Лацу къванер, чlулав накьвар.

Вучайтlани хуьз жедач хьи,

Кьве вилелай кIвахьай накъвар.

Вили лифрен луварар хуй,

Булахдин яд рагъул авур.

За бубадиз вуч лугьуда,

Яр кимерал зарул авур.

Эсли верем, Керем дили,

Кьведан ара чапар ятӀа?

КӀанидав гъил агакь тавур,

Закай садаз хабар ятӀа?»

Кьилел алай буьшмедикай

ЦӀилер галай шал хьана хьи.

Дуьньядилай фад фей(и) къелем,

Вун зи рикӀин тӀал хьана хьи...

Вил вегьена, вил агакьнач,

Чи Шагь дагълар кьакьан хьана.

Яр амачир яргъи уьмуьр

РикIиз пара такӀан хьана.