Азербайжан шаиррин ватан я лагьайтlа, чун ягъалмиш жедач. Ина хуралай шиирар кlелдайбур гзаф ава. Республикадин ахьтин са пlипl авач хьи, анай тlвар-ван авай шаирар акъат тавурай. Прессадин муг яз гьисабзавай Баку шегьердин «Азербайжан» нешриятдани цlудралди тIвар-ван авай къелемэгьлийри кlвалахзава. 
   Азербайжан гьакlни поэзиядал рикl алай инсанрин ватан я. Ина гафуниз къимет гудай, алакьунар авай къелемэгьлийриз гьурметдайбур гзаф ава. Эбуьлфет Медетогълу хьтин инсанриз лагьайтlа, абуру рикlяй икрамда. Датlана столдихъ ацукьна кхьинрив машгъул тир и шаир-публицистдалди, къени къилихрин иесидалди, зегьметдал гзафни-гзаф рикl алай пешекардалди вирибуру дамахда. 
   Эхь, Азербайжандин пешекар журналистрин арада кьетlен чка кьунвай, сад-садалай марагълу макъалайралди кlелдайбурун гьуьрмет къазанмишнавай Эбуьлфет Медетогълу журналистикадив тек са къуллугъдин чкадив хьиз, адетдин пешедив хьиз ваъ, йиф-югъ талгьана лежберди хьиз гафарин никlер цазвай инсан хьиз агатнавайвиляй чидайбуру адакай рикl ацlанваз рахада. Адан кьакьан руьгьдикай, ватанпересвиликай, къени къилихрикай гаф кутада. 
   Эбуьлфет Медетогълу (Алиев Эбуьлфет Медетан хва) 1959-йисан 1-январдиз Дагълух Къарабагъдин Хожавенд райондин Тугъ хуьре дидедиз хьана. Эрмени миллетчийри кутур мидявал себеб яз арадиз атай дяведи ватандивай къакъудай, вичин ва хайибурун, ярар-дустарин кьисметда гзаф йисарин чаравал гьатай Эбуьлфетан тахьайтlани гъарикl тир рикl и вакъиайри генани сугъуларна. Вичин рикlин сузаяр, хажалатарни гъамар теснифиз алахъай ада къелем яракьдиз элкъуьрна. 
   Журналистикадив «Тешвикъатчи» журналдин корректор хьиз эгечlай ада гуьгъуьнлай Азербайжандин Гьукуматдин Университетдин тарихдин факультетда чирвилер къачуна. Анаг акьалтlарна «Aраз», «Къарабагъ» ва «Aзербайжан ордусу» газетра мухбирвиле кlвалахна.  
1992-йисалай «Адалат» газетдин кьилин редактордин заместитель тир адан къелемдикай хкатзавай гьар са макъала са вакъиадиз элкъвезва. Ингье зи ихтилат адан поэзиядикай я. Вучиз лагьайтlа гзафбуруз Эбуьлфет Медетогълу хъсан шаир хьиз чида. Ам икьван гагьди басмадай акъатнавай гзаф ктабрин автор я. 
   Авайвал лагьайтlа, Эбуьлфетан шиирри зун чпихъ ялзавай гзаф жигьетар ава. Абурукай сад лагьайди и шаирдин шииррин ацlай, къени, михьи чlал я. Адан цlарара гзафбуру фадлай рикlелай ракъурнавай халисан халкьдин чlал рахада вав. Миже квай, алатай вахтар рикlел хкидай, рикl юзурдай хайи чlал. Садбуру хьиз, алаз-алачиз патан чlаларай атанвай гафарикай менфят къачудач ада. Кьвед лагьайди, ада адетдин гафар акьван сересдиз лугьуда, чка атунивай акl харжда хьи, мягьтел жеда вун. 
   Эбуьлфетан тешпигьрин иервили гьейранарда кlелдайди. Адан поэзиядиз вичин гаф куьрелди ва хцидаказ лугьун хас я. Садбуру хьиз, яргъияр авуникай хуш къведач адаз. Фольклордални халкьдин поэзиядал гьейран тир и шаирдин шиирарни гьа руьгьдинбур я. Адахъ 7-8 гьижадин шиирар гзаф хьунихьи и кар тестикьарзава.
   Лирикадин шаир хьиз сейли тир Эбуьлфетан поэзияди гъамлу, сефил, зарул нотайралди туькlуьрнавай манияр хьиз эсерда ваз. Ихьтин манийрихъ фикирри басрух гайила, машинда аваз рехъ фидайла, кlвале ялгъуз тирла яб акализ кlан жеда. Ина хъуьтуьл гьиссер рахада вав.
   Адан лирикадин образни тафаватлуди я. Ам шаирдин рикlе кlевелай вичин чка кьунвай, садавни гекъигиз тежер дишегьли я. Иервилин кукlушда аваз сакlани рам тежезвай, чlехи муьгьуьббатдин чешне тир и образдиз туькlуьрнавай шииррин садани муькуьди тикрарзавач, гьар са шиир цlийи рангаралди, цlийи тешпигьралди туькlуьрнавайди я лугьуз абуру галуддач вун, акси яз руьгь ацlай хьиз жеда ваз. Халисан поэзия ава и шиирра.
   Чи гзаф йисарин къелемдин дуст, «Самур» газетдал рикl алай Эбуьлфет Медетогълудин шииррин чlал акьван фасагьатлуди, рикlе ацукьдайди я хьи, абур лезги чlалаз регьятвилелди элкъуьриз жезва. Вичин шиирар туьрк, фарс ва урус чlалариз элкъуьрнавай шаирдин шиирар сифте яз лезги чlалаз элкъуьрнавайди я. Кlелдайбуру абур хъсандиз кьабулдайдан чlалахъ я чун.