И йикъара Бакудин Мультикультурализмдин Меркезда «Самур» Милли Медени Меркездин гьахъ-гьисабдинни хкягъунин кlватlал кьиле фена. Республикадин Гьукуматдин Гимндилай гуьгъуьниз ватан хвена шегьид хьайи кьегьалар са декьикьа кисна рикlел хкана.
   Алатай йисара кьиле тухвай крарин гьахъ-гьисабдин рахунар авур «Самур» Милли Медени Меркездин кьил Имран Рзаева чи уьлкведа президент Илгьам Алиеван регьбервилик кваз датlана мультикультурализмдин сиясат кьиле тухузвайди, кьадардиз тlимил халкьариз чlал, меденият ва адетар хуьн паталди къайгъу къалурзавайди, медениятдин меркезриз куьмек гузвайди кьилди къейд авуна. Ада гьакlни и рекьяй гзаф зегьметар чlугвазвай Бакудин Мультикультурализмдин Меркездин кьиле авайбуруз разивал къалурна.
   Мярекатда иштирак авур Мультикультурализмдин Меркездин директордин заместитель Рамин Къемберова Азербайжанда толерантвални мультикультурализм гьукуматдин сиясатдин кьилин хилерикай сад тирди, ина жуьреба-жуьре халкьарин ва динрин векилар ислягьдаказ, рейсадвилелди яшамиш хьунин къайгъу чlугвазвайди къейд авуна. Кlватlалдал Меркездин уьзвияр тир Афер Алифова, Дуьньямеддин Аскерова, Седакъет Керимовади, Завир Нежефова, Камран Къурбаналиева, Абир Тагьирова, Эдвиг Гьасанова ва масабуру алатай йисара кьиле тухвай крарикай малумат гана.
   Кlватlалда иштирак авур чи халкьдин тIвар-ван авай векилри – Шаир Рамалданова, Сейфел Гьасанова, Сенан Xaлилова, Муьзеффер Меликмамедова, Видади Севзиханова, Финяз Нуралиева ва масабуру меркезди кьиле тухвай кlвалахрикай веревирдер авуна, са бязи татугайвилер арадай акъудун патал чпин теклифар гана.
   Эхирдай «Самур» Милли Медени Меркез идара ийизвайбур хкяна. Аник Имран Рзаев, Афер Алифов, Дуьньямеддин Аскеров, Седакъет Керимова, Завир Нежефов, Камран Къурбаналиев, Абир Тагьиров ва Эдвиг Гьасанов, гьакlни цlийиз хкягъай Шаир Рамалданов ва Сейфел Гьасанов акатна. Имран Рзаев цlийи кьилелай седривиле хкяна.