«Ван алачир гьарай» фильмдиз 1000000 касди килигнава

   Вичи кхьенвай сценаридин бинедаллаз Седакъет Керимовади чIугунвай «Ван алачир гьарай» фильмдиз YouTube-да 1000000 касди килигнава. Диде-бубайри гадарнавай аялрикайни веледри рикIелай алуднавай хайибурукай ихтилатзавай и фильмди килигайбуруз кIевелай эсернавайди фильмдин кIаникай чапнавай агъзурралди комментарийрай хъсандиз кьатIуз жезва. «Самур» газет кIелзавайбурун тIалабуналди чна агъадихъ са шумуд баян гузва.

   Вилерал накъвар алаз килигна за фильмдиз. РикI атIана зи ана кьиле фейи крари. Ихьтин къадирсуз веледар яраб гьикI арадиз къвезватIа? Хъсан тербия гудай фильм я. Сагърай вун, Седакъет Керимова, ихьтин фильмаяр чIугуна инсанриз тербия гузвай.
Ибрагьим Гьасанов

   Зун кьве хцин диде я. Яраб Аллагь зи рухвайривайни зун икьван регьятдиз рикIелай алудиз жеда жал? За гайи нек гьарам жедачни абуруз? Гьар гьикI ятIани, и фильмдилай кьулухъ за жуван пакагьан йикъакай фагьумзава. Кьулухъ пул вегьизва гила за, пака вуч жедатIа низ чида? Садазни муьгьтеж тахьун патал жуваз шийи-кепек хьайитIа хъсан я.
Гуьлжагьан Абдуллаева

   Гьикьван чIехи рикI авай дишегьли я Сарият. Вич веледри гадарнаватIани, кьве етимдиз аявалзава. Фильмдин эхирда ам Сэнуберни Теймур галаз хъфидайла зун угьуяр ягъиз шехьна. За жуван уьмуьрда икьван таъсирлу фильмдиз килигайди туш. Чан сагърай Седакъет ханумдин, ихьтин дерин манайрин фильмайралди чи рикIера къени цIирер цазвай.
Гьейбат Дуьгуьшов

    «Ван алачир гьарай»диз за исятда килигна куьтягьнава. Инсан вич бахтлу хьайила бахтсузбурукай хабар кьадач лугьуда. Зун Аллагьдилай рази я хьи, зи кьуд веледни къадир чидай, диде-бубадин зегьметар квадар тийидайбур я. Зун гъуьлуьхъ галаз санал хуьре яшамиш жезва. Аялар Бакуда чпин хизанрихъ галаз ава. Ингье ахьтин сувар жеч хьи, абур вири хтана кIвал шад ванерив ацIур тавурай. Абур рикIел гъиз жува-жуваз суал гузва за: Белки Сарията вичин веледриз тербия гудайла са гьинал ятIани галайвал авунвач?   Жуван ивидикай тир веледар икьван къайи хьун мумкин туш эхир. Завай хьайитIа, режиссердиз гьа и кар агакьариз кIанзава.
Эфризат Мурадханова

   И фильмдиз за «İctimai» телевиденидин экрандай килигна. «Оскар» премиядиз лайихлу фильм я. Халисан тербия гудай, инсанрин гьиссерал звал гъидай, абурув фагьумиз тадай ихьтин фильмаяр гьайиф хьи, тIимил чIугвазва. Заз рикIин сидкьидай фильм арадиз гъайибуруз сагърай лугьуз кIанзава. Чи экранар гьакIан, метлебсуз передачайрив ацIанвай къенин юкъуз ихьтин фильмайрин къимет чир жезва. 
Рашид Гуьлалиев