Чемпионар гьазурнай
Вич Дагъустан Республикадин Мегьарамдхуьруьн райондай тир машгьур лезги спортсмен, Россиядин лайихлу тренер Максим Абдулмежидова са шумуд йис инлай вилик сифте яз Москвадин Лосиноостровский райондин 12-нумрадин колледжда спортдин клуб кардик кутунай. Гуьгъуьнлай ам жегьилар сагъламвилин ва ватанпересвилин рекьяй тербия ийизвай меркездиз элкъуьрнай.
Машгьур лезгидин клубди 2012-йисал къведалди залан атлетикадай 50- дав агакьна спортдин устIарар, 70-далай гзаф кандидатар гьазурнай. Адан клубдай Россиядин 17, Европадин 12, дуьньядин 6 чемпион акъатнай. Дуьньядин ва Европадин чемпионрикай 4 кас лезгияр я.
Тарсарин ктаб
ТIвар-ван авай лезги алим, хуьруьн майишатдин илимрин доктор, профессор Ю.Ибрагьимован илимдин кIвалахар Америкадин Садхьанвай Штатрин, Германиядин, Испаниядин, Франциядин, Венгриядин, Россиядин илимдин журналра чап хьанва.
Адан хипехъанвал вилик тухуникай кхьенвай тарсарин ктабдикай виликдай вири СССР-дин талукь институтра чирвилер къачузвай. Уьзбек ва къазах чIаларал чапдай акъуднавай адан цIийи тарсарин ктаб Уьзбекистандин ва Къазахстандин хуьруьн майишатдин институтрин студентри кIелзава.
ЧIал чирзава
Америкадин Садхьанвай Штатрин Кефер Аризонадин Университетдин алимар махарик квай хьтин ажайиб туькIуьрун арадал гъиз алахънава. Абуру гьазурзавай аппаратри гьайванрин ванер инсандин чIалаз элкъуьрдай мумкинвал гуда.
ЦIийи аппаратрин куьмекдалди инсанриз вини кьил 10 йисалай гьайванрин чIал чир жеда. Алимри лугьузвайвал, мукьвал йисара чун калин шикаятдин, асландин гъургъурдин, билбилдин манийрин гъавурдани акьада.
