Пачагьлугъдин Урусатдин вахтунда сейли хьайи лезги генералар садни кьвед туш. Гьина къуллугъ авунилай аслу тушиз абуру гьамиша чешне къалурдай. Ихьтин машгьур лезги генералрикай сад Къазанфаров Гьасан Къазанфаран хва (1841-1928) я. Вич Къиблепатан Дагъустандин Мамрач хуьре дидедиз хьайи Гьасан Къазанфарова Урусатда вини дережадин чирвилер къачурдалай кьулухъ военный инженерди хьиз, и уьлкведин са шумуд вилаятда кIвалахнай. Гзаф йисара Яргъал РагъэкъечIдай пата яшамиш хьайи ам вичихъ чIехи алакьунар авай кас тир. А девирда ада хьиз военный муькъвер садавайни эцигиз жезвачир.

   Гьасан Къазанфарова шумудни са инженерривай тахьай са кIвалах кьилиз акъуднай. Енисей вацIал муьгъ эцигайдалай кьулухъ ам къецепатан уьлквейриз сейли хьана. Англиядин, Германиядин, Франциядин ва Италиядин гьукуматри адаз чпин уьлквейриз теклифна. Ингье Гь.Къазанфарова а теклифар кьабулнач ва Урусатда кIвалахун давамарна.

   Идалай кьулухъ урус пачагьди Гь.Къазанфароваз вичин кьилив эверна. И машгьур инженердин алакьунрикайни крарикай хабар авай пачагьди адаз генералвилин чин ва къизилдин медаль гана. И вакъиадилай кьулухъ лезги генералди 30-дав агакьна цIийи военный муькъвер эцигнай. Енисейдал эцигнавай муькъвел кьилди Гьасан Къазанфарован тIвар кхьенва.