РикIелай ракъур тийин
Играми редакция! Виликай къвезмай 2026-йисуз лезги халкьди Куьредай тир чи кьве машгьур генералдин юбилеяр къейд ийида. Пуд йисалай, ХIХ асирда Куьредин судьявиле кIвалахай генерал Гьажи Юсуфхан Тагьиран хва Юсуфханов (1806-1878) дидедиз хьайи 220 йис, адан хтул генерал Алияр бег Мегьдидин хва Гьашимбегов (1856-1920) дидедиз хьайи 170 йис тамам жезва.
Юсуфхановрин хизан Куьредай Бакудиз куьч хьайидалай кьулухъ, 1856-йисуз ина дидедиз хьайи Алияр бегди 1918-йисуз Азербайжандин милли армияда къуллугънай. Ада Азербайжандин Демократик Республикадин къенепатан крарин министрдин заместителвилени кIвалахнай. Вичин уьмуьрдин эхиримжи йисара Закъатала уезддин генерал-губернаторвиле кIвалахай Алияр бег 1920-йисан июндиз большевикри гуьлле гана кьенай.
Играми редакция! Ихьтин машгьур лезгийрикай икьван гагьди са макъала, са ктаб кхьенач. Я куьчейриз абурун тIварар ганвач, гуьмбетар хкажнавач. Заз чи халкьдин чпихъ мумкинвилер авай кьегьал рухвайрихъ элкъвена лугьуз кIанзава: «Стхаяр! Ша чна чи машгьур генералрин тIварар лайихлудаказ арадиз хкуниз куьмек гун, абур рикIелай ракъур тийин!»
Мегьамед Агьмедов,
Дагъустан Республикадин СтIал Сулейманан район
Рушарин агалкьунар
Гьуьрметлу редакция! Лезгияр спортдал рикI алай халкь тирди виридаз хъсандиз чизва. Чахъ вишералди Дагъустандин, Азербайжандин, Россиядин, Европадин, дуьньядин, олимпиадайрин чемпионар ава. Куьне «Самур» газетдин чинриз ихьтин чемпионрикай шумудни са макъалаяр акъуднава. Абурун арада гадаярни ава, рушарни. Амма бязи газетри вучиз ятIани гада чемпионрикай генани пара макъалаяр чапда. Спортдин кукIушриз хкаж хьанвай чи рушарикай лагьайтIа, тIимил кхьида. Заз ихьтин бязи лезги дишегьли чемпионар рикIел хкиз кIанзава.
Чахъ 2000-йисуз армреслингдай Дагъустандин, Россиядин, дуньядин ва Олимпиададин чемпионвилин тIвар къачур Замира Рагьманова, шагьматдай акъажунра са шумуд къизил медаль къачур, Азербайжандин ва СССР-дин чемпион хьайи, Кеферпатан Къафкъаздин халкьарин спартакиадада сад лагьай чка кьур, Каспий гьуьлуьн патарив гвай уьлквейрин спартакиадада пудра къизил медаль къачур Афет Аливердиева хьтин спортдин кукIушриз хкаж хьайи гьикьван лезги рушар ава.
Вич асул Дагъустандин Миграгъ хуьряй тир, алай вахтунда Москвада яшамиш жезвай Алина Мурадалиева спортда аламатдин вакъиа я. Ам 2010-йисуз гьеле юкьван мектебдин ирид лагьай синифда кIелдай вахтунда гьар жуьредин акъажунрай дуьньядин чемпион хьанай. И дережадив агакьдалди ада Россиядин ва Европадин чемпионвилин тIвар, гьакIни 14 медаль къачунай.
Чахъ ихьтин чемпион рушар мадни ава. Гьайиф къведай кар ам я хьи, икьван гагьди абурун агалкьунрикай са ктаб кьванни кхьенвач. Куьчейризни мектебриз абурун тIварар гун, гуьмбетар хкажун садан рикIелни алач. Са кар рикIелай ракъурна кIанзавач. Чи рушарин агалкьунар неинки хайи халкьдик, гьакI вири дуьньядик дамах кутазвайбур я.
Тамилла Бекерова,
Дагъустан Республикадин Дербент шегьер
