Нажмудин Шихнабиев 1947-йисуз Дагъустан Республикадин Кьасумхуьруьн райондин Асалдхуьре дидедиз хьана. Шихидхуьруьн юкьван мектеб, ДГУ-дин филологиядин факультет акьалтIарна. Алай вахтунда Шихидхуьруьн юкьван мектебда муаллимвиле кIвалахзава. Адан «Куьредин билбил», «Мехъер», «Уьмуьрдин декьикьаяр», «Куьреда аламатар», «Хкягъай эсерар», «Большевик» ктабар чапдай акъатнава.

Сулейман чахъ галаз хьана

Ви гьар са гаф хьана къизил,

Лезгидалди рахаз кьезил,

Девир куьруь хьана мензил,

Вун кукIушдал алаз хьана.

Ваз гележег акунай фад,

Инкъилабар хъжерди мад,

Сиясатдихъ тежерди дад –

Ви чIалара аваз хьана.

ЧIуру ният авай инсан

Ажеб вуна негьна хъсан.

Арифдарар тир ваз масан,

На гьабур чаз къалаз хьана.

Гафар тIимил, мана гзаф –

Ажайиб тир суьгьуьрдин саф.

Чладавай шаирдин гаф

Ваз вахтунда акваз хьана.

Накьан югь чаз тиртIа мичIи,

Къе чахъ амач крар пичIи,

Зурба хьанва камар гьвечIи,

Сулейман чахъ галаз хьана.

Зун рикI я...

Зун жив я, вун акурла цIрадай,

Зун гар я, вун атайла къугъвадай,

Зун чил я, тек са цавув рахадай,

Зун дагъ я, тек са чили зурзурдай.

Зун рагъ я, гьамиша ваз хъуьредай,

Зун варз я, йифиз са ваз туьмердай,

Зун багъ я, къелед цлар тежедай,

Зун вацI я, кьулухъ элкъвез тежедай.

Зун гъед я, умуд атIун тийидай,

Зун гел я, цава-чиле таквадай,

Зун рехъ я, фена куьтягь тежедай,

Зун хьел я, рикIе хер-кьацI тийидай.

Зун лекь я, дагьдиз цавай килигдай,

Зун стIал я къванцяй тIеквен акъуддай

Зун цуьк я, рагак дувул кукIурдай,

Зун чад я, ашкъид гьиссер къизмишдай.

Зун гад я, зул къвалав гваз дамахдай,

Зун дад я, емишдин ад акъуддай,

Зун гьуьл я, залан дердер батмишдай,

Зун мез я, инсанвал квайд саймишдай.

Зун рикI я гьиссерин кIунчI багъишдай

Зун ким я, ашукьбуру алхишдай.

Зун цIай я, гьулдандин рикI ифирдай,

Зун сад я, устад я ви тарифдай.