Вичин иервилин суракьар вириниз чкIанвай Гуьлсуьм бике Дагъустандин гилан СтIал Сулейманан райондин КIварчагърин хуьряй тир. Къарахан бегдин руш тир ам бубадин гьукумдалди Куьре ханлухдин гьаким Аслан хандиз гъуьлуьз фенай. Са кьадар вахтундилай гьакимди вичин дуьнья дегишарнай. Аслан хан кьейила адан рухваяр Мегьамед Мирзени Мегьамед Нуцал гьеле гъвечIи аялар тирвиляй ханлух Гуьлсуьм бикеди идара  авунай.
   Чи сейли алим Гъалиб Садыкъиди малумат гайивал, Гуьлсуьм бике вичихъ гзаф алакьунар авай хан тир. Ада са шумуд хуьре мектебар ва мискIинар эцигиз тунай. Налогрин кьадар тIимиларнай. Хуьруьнвийриз цанар цадай чилер вуганай. Ам вириниз адалатлу хан хьиз сейли хьанай.
   Гъалиб Садыкъиди Гуьлсуьм бикедин алакьунрикай хабар гузвай са документ винел акъуднай. А документда къалурнавайвал, Дагъустандай Мекке шегьердиз гьаждал физвай дагъвийрал Дамаск шегьердивай кьибледихъ са кьадар мензилда къарачи арабрин чIехи кIеретIди гьужумнай ва абурув гвай шейэр къакъуднай. Дагъвийри Дамаскдин гьакимдиз гьикьван арза-ферзе авунатIани, хийир хьаначир. Эхирни абуру лезги хан Гуьлсуьм бикедал гьанай шикаят ракъурнай. Гуьлсуьм бикеди Дамаскдин гьукумдардивай дагъвийриз куьмек гун тIалабнай ва адан тIалабун кьилиз акъатнай.