Адан чкадал масад хьанайтIа, фадлай галатдай, четинвилериз таб гуз тахьана и кIвалахдивай яргъал жедай. Ада лагьайтIа, 28 йис я чи редакциядин къайгъу чIугваз.
   Муьбариз Азизов галачиз «Самур» газет акъудун чаз гзафни-гзаф четин жедай. Ам и кардив хайи халкь ва лезги чIал кIани, жуванбурук рикI кузвай са инсан хьиз эгечIна. Газетдин рекье ада вичин чанни эцигна, пулни. ДатIана «Самурдин» таъсиб хуьзватIани кадрдин кьулухъ амукьзавай ам чи арха, чи сад лагьай кIелдайди ва критик я. 
   Муьбариз Селимханан хва Азизов 1950-йисуз КцIар шегьерда дидедиз хьана. КцIарин 1-нумрадин юкьван мектеб гимишдин медалдалди акьалтIарай ам Азербайжандин НафтIадинни Химиядин Институтдик экечIна. Институт кьилиз акъудайдалай гуьгъуьниз ада гзаф йисара Бакудин холодильникрин заводдин цехерикай садаз регьбервал гана. Гзаф йисар я Муьбариз Азизова «Метак» компанида кIвалахиз. 
   28 йис я «Самур» газетдин редакция компьютерралди, принтерралди ва маса техникадалди таъминарун ада вичин хивез къачунва. Авайвал лугьун хьи, гагь-гагь четинвилери чуькьуьз чун руьгьдай аватай вахтара Муьбариза чак руьгь кутада. Газет датIана акъудун, халкьдив агакьарун паталди ада гъакъисагъвилелди чIугвазвай кьван зегьметар гекъигиз тежерди я. 
Шумудни са йисара агъзур километрралди рекьер атIана вичин машинда аваз «Самур» газет кIелдайбурув агакьарай ада зарафатдалди «ЦIийи машинар мад гьатдайди я, газетдин крар туькIуьрай» лугьудай. Гила газет электрон версиядалди акъатзаватIани, чи зегьметар тIимил хьанвачирди кьатIузвай М.Азизова эвелан хьиз рикI алаз, гьакъисагъвилелди редакциядиз куьмек гун давамарзава.
   И къени къилихрин, заха ва умун инсандин 14-апрелдиз 75 йис тамам хьана. Чна адаз юбилей рикIин сидкьидай мубаракзава, яргъи уьмуьр, чандин сагъвал, руьгьдин кьакьанвал, хизандин бахтлувал тIалабзава.

«Самур» газетдин коллектив