И мукьвара ихьтин тlвар алаз  Магьачкъалада чапдай акъуднавай цlийи ктаб чи редакциядиз агакьарнавай Фазир муаллимдиз рикlин сидкьидай сагърай лугьузва чна. Ктабди вичин иер кlалубдалди, рикl ахъайдай рангаралди чун вичихъ ялна. Адан чарарилай ам пешекарвилелди басма авунвайди гьасятда чир жезва. Аялри кхьенвай махар санал  кlватlна чап авун, са шакни авачиз, суваб кар я. Рикl ахъайдай кар ам я хьи, и ктаб туькlуьрнавайди Дагъустан Республикадин Ахцегь райондин Хуьруьгрин хуьре кардик квай «Люминари» маарифдин меркез я. Авайвал лагьайтlа, хуьре ихьтин меркез хьун, ада аялрихъ галаз кlвалахун, абурухъ галаз санал марагълу проектар кьиле тухун рикl ахъайдай кар я. Дидед чlал, халкьдин фольклор, адан этнография хуьн патал и меркезди гзаф къени крар кьилиз акъудзава. Ихьтин зурба ктаб арадиз гъунни гьадан тlалабун я. 
   Эхь, дидед чlалан къадир авай, квелин тахьана ам аялриз кlанариз алахъзавай камаллу ксарин регьбервилик кваз лезги аялри санал кlватl хьана цlийи жуьредин махар кхьенва. Гьахъни гьахъсузвал, хийирни шийир, шелни хъвер гекъигна, дуьньяд крар къени, михьи, хъсан патахъ ялун патал чпин веревирдер авунва. И кар патал аялрин куьмекдиз цlийи къагьриманар, акьуллу гьайванар атанва.
   Дагъустандин Ахцегь, Стlал Сулейман ва Хив районра 7 махарин кархана туькlуьрай и проектдин кьиле авайбуру сифте аялриз фольклордикай гегьеншдиз чирвилер ганва, и карда абурув шаирар, чlалан устадар, эдебиятчияр,  муаллимар ва чlалан таъсиб чlугвазвайбур эгечlнава.
   Санлай 214 аялди 171 мах арадиз гъанва. И ктабда лагьайтlа, лезги чlалал кхьенвай 52 мах гьатнава. Амайбур  кьилдин сайтда эцигда.
Дагъустандин Гьукуматдин грантдин ва «М.А.Абдулкеримован тlварцlихъ галай маариф фондунин» куьмекдалди арадиз гъанвай и проектдик къуьн кутунвайбурукай сад тlвар-ван авай шаир, педагог ва театрдин критик Фазир муаллим я.
   Зурба ктаб хьанва. Адакай мектебдин аялривай гегьеншдиз менфят къачуз жеда. И махари чун ахьтин са фикирдал гъизва хьи, хайи чlалаз аявал авуртlа, адан къадир чир хьайитlа, ам шумудни са несилрив агакьда.