Лезгийрин тIвар-ван авай камалэгьли, Дагъустандин халкьдин артист, харусенятдин лайихлу деятель, композитор, шаир, драматург, публицист хьиз вириниз сейли хьайи Асеф Мегьманан тIвар чи ватванэгьлийри дамахдалди кьада. Адан эл кIанардай, ватан кIанардай, сефил рикIер аладардай, гъам квадардай, рикI шадардай манийри руьгь кутада чак. Асеф Мегьманан манийрихъ яб акалдайла хайи чилин иервилер вилерикай карагиз гьарайиз кIанда рикIиз: «Эгьей!.. Лезги эллер, яб це и ванерихъ. Агъзур йисара гагь хъуьрез, гагь ишез, гагь женг чIугваз, гагь дерт чIугваз хьайи са халкьдин авазар я абур. Дуьгуьм хьанвай тIалар, лигим хьанвай гьалар, сисим хьанвай авазар я абур. ДатIана тIвар хуьзвай, къадим манийрин зар хуьзвай, халкьдин рикIяй хабар гузвай манияр я абур!»
   Асеф Мегьманан манияр чаз икьван кIанарзавайди абурун халкьдин манийриз, гьиссериз, дердийриз мукьвавал я. Гьавиляй Дагъустандин машгьур музыковед Маймусат Къурхмазовади кхьенай: «Асеф Мегьманан яратмишунрин манера халкьдин яратмишунриз мукьва я…       Вичин бине фольклордай къачузвай адан манияр, халкьдин арадиз хтана адак какахьзава, гзаф вахтара вич яратмишнавайдан тIварни рикIелай алатзава. Автордин чIехи бахтаварвални гьам тушни ?»
   И бахтаварвилин кьилин лишан ам я хьи, Асеф Мегьманан са кьадар манияр халкьдин манийриз элкъвенва. Гьам абурун халкьлувиляй, гьамни абур Дуьруья Рагьимова, Айдунбег Камилов, Тарлан Мамедов, Рзабала Агъабалаев, Суьлгьуьят Гьажиева, Роза Максумова хьтин чи сейли манидарри лагьайвиляй.
   И мукьвара Бакуда чи республикадин лайихлу журналист Видади Севзиханов редактор яз Асеф Мегьманан манийрикай ибарат «Лув це, мани!» тIвар ганвай ктаб чапдай акъуднава. Ана гьам манийрин текстер, гьамни нотаяр ганва. Ктабдиз сифте гафни кхьенвайди В.     Севзиханов я. «Алам» журналдин редакциядин коллективдин куьмекдалди экв акунвай и ктаб кIелдайбурун рикIяй жедайдан чIалахъ я чун.