Бакуда лезги чlалал, иер кlалубда аваз «Сад авай, сад авачир…» тlвар ганвай махарин ктаб чапдай акъатнава. Им рикl ахъайдай, руьгь кутадай хъсан хабар я. Вучиз лагьайтlа кьетlен хатl авай жегьил къелемэгьли Азизрин Севда вичин марагълу махаралди Азербайжандин хьиз, Дагъустандин кlелдайбурузни сейли хьанва. Гзаф йисар я адан махар «Самур» газетдин чинриз акъатиз. Авторди ктабда хиве кьунва: «Самур» газетда «Самурдин мектеб» рубрика кардик кваз гзаф йисар я. Аялар паталди газетдин и чин халисан мектебдиз элкъвенва. Виликан йисара а рубрикадихъ кваз лезги чIал чирзавайбур патал зи куьруь диалогар чап жезвай. Гуьгъуьнлай а диалогар гъвечIи гьикаяйриз элкъвена».

   Гьа икl, «Самур» газетдин кьетlен мектебда къвердавай чlехи агалкьунар къазанмишай Севдади 2019-йисуз вичин «Фири яру шив» тlвар алай сад лагьай ктаб чапдай акъудна. Ам гъвечlи-чlехи вирибуру гзаф хушвилелди кьабулна. Иер шикилралди туькlуьрнавай а ктаб аялрин рикlяй хьанай. Юкьван мектебрин агъа синифра кlелзавайбуру адaкай гегьеншдиз менфят къачузва.

   «Сад авай, сад авачир…» Азизрин Севдадин аялар паталди кьвед лагьай савкьват я. Цlийи ктабда гьатнавай махари аялриз хайи чилни тlебиат кlанарзава, дуствални вафалувал вуч ятlа чирзава, акьул бахтлувилин, зегьмет экуь уьмурдин лишанар тирди къалурзава. И ктабдин метлеблувал иер шикилри генани артухарзава. Яцlу жилд акьалжна ранглуз чапнавай ктабда амалдарвилер негьзавай, хъсанвилерихъ ялзавай, несигьатдин руьгь квай, тербиядин эсер ийидай цlийи махар гьатнава.

   Кlелдайбуруз  вичикай ихтилатдайла авторди лугьузва: «Дуьньяда зи виридалайни чlехи мурад лезги чlал вилик тухуз алахъун, адал рикl алайбурун кьадар къвердавай гзаф хьунухь я. Жуван «Сад авай, сад авачир…» тlвар ганвай кьвед лагьай ктаб гьа мураддалди чапдай акъуднавайди я за.» 

   Чна «Самур» газетдин кlвалахдар, вичихъ алакьунар авай жегьил къелемэгьли Азизрин Севдадиз цlийи ктаб рикlин сидкьидай мубаракзава, адаз мадни чlехи агалкьунар тlалабзава. Чун чlалахъ я хьи, ктаб вирибуру рикl алаз кlелда, ам иллаки аялрин рикlяй жеда.