Алай йисан 21-ноябрдиз Бакуда сифте яз дуьньядин вилик физвай 8 уьлкведин Экономикадин Рекьяй Санал КIвалахзавай Тешкилатдин Медиа Форум кьиле фена. Азербайжан Республикадин Президент Илгьам Алиева мярекатдин иштиракчийриз эвер гана. Ада къейд авурвал, гилан дуьньяда информация анжах хабар лагьай чIал туш. Информацияди дуьньядин халкьарин арада алакъаяр генани мягькем хьуниз, абурун фикиррин рейсадвилиз, гьакIни экономикадин рекьяй вилик финиз куьмек гузва.
   Гьайиф хьи, алай вахтунда информациядин маканда дезинформация, къалп ва тапан хабарар, «deepfake»ар, тIебии тушир интеллектдин мумкинвилерикай чIуру крар патал менфят къачузвай ва маса манипуляциядин гьалар къвердавай пара жезва. Гьа ихьтин факторри гьам уьлквейрин къенепатан крариз, гьамни вири дуьньядин дурумлувилиз пис таъсирзава. Гьавиляй D8 Медиа Форумдин кьилин везифайрикай сад дуьз тир, терефкарвал тийидай, адалатлу, са патазни манийвал авачир гьахълу ва жавабдар информациядин шартIар арадал гъун я.
   Азербайжандин милли медиадин стратегия дуьньядин хъсан тежрибадикай менфят къачуникай, журналистрин пешекарвал артухаруникай, фактарал бинелу тир хабарар чукIуруникай, медиадин савадлувал вилик тухуникай ибарат я.
Сифте яз D8 Медиа Форум Азербайжанда кьиле тухун дуьшуьшдин кар туш. Тешкилатдин кьил Исиака Абдулкъадир Имама мярекатдал къейд авурвал, Азербайжанди D8-ак экечIай са йисан къене адан кIвалахдик чIехи пай кутунва. Ам тешкилатдик экечIуникди ина вирибурук руьгь акатнава, хъсан патахъ гьерекат арадиз атанва.
   Эхирдай форумдин иштиракчийри мярекатдихъ авсиятда декларация кьабулна. И документда кьилди кхьенва: «Чна D8 генани гужлу авун, нуфуз авай экономикадин блок хьиз вилик тухун патал и кардик пай кутуна лидервал ийизвай Азербайжан Республикадин Президент Илгьам Алиеваз дериндай разивал къалурзава.»