Алай йисуз Азербайжандин милли прессадин 150 йисан юбилей гегьеншдиз кьиле тухун къарардиз къачунва. И вакъиадихъ авсиятда 25-апрелдиз Азербайжан Республикадин Президент Илгьам Алиева серенжем кьабулнава. Ана къалурнавайвал, 150 йис инлай вилик – 1875-йисан 22-июлдиз Азербайжандин машгьур алим, маарифчи ва публицист Гьасан бег Зердабиди азербайжан чlалал «Экинчи» тlвар ганвай газет чапдай акъуднай. Им Азербайжандин милли прессадин сифте чешне тир. Газетдин сад лагьай нумра чапдай акъудай югъ Азербайжандин милли прессадин бине эцигай югъ хьиз къейд ийизва. 
   Азербайжандин милли лидер Гьейдар Алиева кьвед лагьай гъилера уьлкведиз регьбервал гайи йисара кьиле тухвай реформаяр себеб яз чи уьлкведа гафунин ва малуматдин азадвал, фикирдин плюрализм ва демократиядин рекьяй маса азадвилер таъмин хьана.
Халкьдин трибунадиз элкъвенвай Азербайжандин медиади гьар са девирда, гьакlни 44 йикъан Ватандин дяведин вахтунда вичин ватанпересвилин, рейсадвилин рехъ давамарна, чун гьахълу тирди вири дуьньядиз баянарна. Чи милли яракьлу къуватрин, аскер ва офицеррин къагьриманвилерикай датlана кхьена.
   Гъалибвал гъилик авурдалай гуьгъуьниз Азербайжанди «Медиадин гьакъиндай» къанун кьабулна. Газет ва журналар алава налогрикай азад авуна, журналистриз кьетlен кьезилвилер авай ипотекадин кредитдикай менфят къачудай ихтиярар гана. Азербайжандин медиадиз дуьньядин глобал информациядин маканда вичин чка кьадай мумкинвилер арадиз атанва. Гьукуматди датlана къайгъу чlугвазвайвиляй Азербайжандин медиа къвердавай мадни вилик физва.
   Президентди Азербайжандин милли прессадин 150 йисан юбилей гегьеншдиз къейд авун патал талукь идарайриз тапшуругъар ганва.