Алай йисан 22-ноябрдиз Москвадин Россиядин Халкьарин КIвале лезгийрин рикI алай шаиррикай тир Теране Оружовадин яратмишунрин няни кьиле фена. И гурлу ва руьгь кутадай няни арадал атунин себеб шаирдин «Геж хьайи шараг» тIвар ганвай пуд лагьай ктабдиз экв акун тир.Гьам Лезгийрин Милли Медениятдин Автономиядин, гьамни адан проектриз регьбервал гузвай зи теклифдалди Москвада арадал гъайи и няни гурлу мярекатдиз элкъвена.
Им лугьуз тежедай кьван хъсан няни тир. КIвенкIе мугьманар Теране ханумди вичи тешкил авур фуршетдиз желбна. Кьуд патаз лезги макьамрин авазар чкIана. Дагъустандин халкьдин артист далдамчи Мегьамеднур Султанова ва зуьрнечи Руслан Агъабалаева ягъай макьамри мярекатдиз халисан лезги гьава гъана. Мугьманри хушвилелди куьлерна, суьгьбетар авуна.
   Фуршетдилай гуьгъуьниз нянидин яратмишунрин сятар гатIунна. Зал кьиляй-кьилди ацIанвай. Теране Оружовадин шиирар ФЛНКА-дин жегьилрин департаментдин иштиракчийри кIелна. Гьа са вахтунда залдиз шаирдин чIалариз теснифнавай манийрин авазарни чкIана.
   Теране Оружовадин пуд ктабни урус чIалаз элкъуьрай, лезги халкьдин дуст, тIвар-ван авай таржумачи Евгений Феликсович Чекалован рахунри нянидин иштиракчийриз гзаф эсерна. Ада шаирдин яратмишунрихъ галаз вичин алакъайрикай лагьайдалай гуьгъуьниз автордин са шумуд шиирни кIелна.
   Сифте яз лезги дишегьлийрин «Рушарин кIвал» кIватIал туькIуьрай зун паталди и няни лугьуз тежедай кьван багьа мярекат тир. Заз фадлай Теране ханумдин яратмишунрин чIехи няни кьиле тухуз кIанзавай. Лезги макьамри, шаирдин шиирри нянидиз ахьтин шадвални иервал гъанвай хьи, и мярекат геждалди рикIелай алатдач.
   Мугьманри шаир тебрик авурдалай гуьгъуьниз ада кIелзавайбуруз автограф алаз вичин ктабар багъишна. Няни милли музыкадин макьамралди кьилиз акъудна. Чна Теране Оружовадиз яратмишунрин рекье цIийи агалкьунар тIалабзава. Жуван патай лагьайтIа, за ва кIелдайбуру шаирдин къиметлу чIалар халкьдив агакьарун патал генани чIехи алахъунар ийида.

РЕДАКЦИЯДАЙ
Чи рикl алай Теране! Чи руьгьдин вах!
   Ваз къенин югъ мубаракрай!  Рикlин сидкьидай шад я чун ви алакьунрал. Ви шиирар чна гьамиша кlанивилелди кlелзавайди я. Хайи ватандални хайи чилел ашукьвал, дидед чIалаз икрам авун, ам кIанарун ви поэзиядин кьилин мотивар я. Ви шиирар инсандиз вичин жуввал чирзавай, дегь гелерихъ ялзавай кьакьан гьиссер я. 
   Лезги чlалаз авай ви гьейранвал, ви гьар са гафунин деринвилихъ ялун я чаз вун кlанарзавайди. Вун датlана илгьамдин шивдал алаз хьурай, Теране!