Играми редакция! Яран сувар лагьайла лувар акатда чахъ. РикIер шадвилин гьиссерив ацIана ракъинин нурарикайни чилин накьварикай, хъуьтIуьн къаярикайни гатфарин цIаярикай, вацран экверикайни инсанрин крарикай, чи ацукьун-къарагъуникай, дегь чIаварин адетрикай фагьумда чна.
Зи рикIел хъсандиз алама, чун гъвечIи аялар тирла бадеди вичин кьилив кIватIна лугьудай: «Килиг, чан хтулар, Яр чи халкьдин виридалайни чIехи ва верцIи сувар я. Чна ам хъсандиз кьиле тухвана кIанзава. ИкI авуртIа, чахъ йис тирвал рузи-берекатни жеда. Куьне чIехибурун акьуллу меслятрихъ яб акална кIанзава. Гьар са карда абуруз куьмек гана, эдеблувал къалурна кIанда хьи, куьнни рехи хьайила квез гьуьрмет ийидайвал».
Ахпа бадеди Яран паяр гана чав манияр лугьуз тадай. Чнани хордалди лугьудай. Садра гьикI ятIани за жузуна: «Я баде, вуна чаз Яран манияр чирзава, бес бубайри лугьузвай акьуллу гафар ни чирда?»
Баде хияллу хьана ва бубадиз эверна: «Я итим, аку и аялри вуч лугьузватIа. Абуруз бубайрин гафар чириз кIан я. Лагь, чи бубайрин мисалрикай».
Бубади сивик хъвер кваз чаз килигна ва акьван хъсан Яран мисалар лагьана хьи, чун пагь атIана амукьна. За а вахтунда юкьван мектебда кIелзавай ва бубади лагьай мисалар дафтардиз кхьенай. Авайвал лагьайтIа, а береда чна бубайрин гафарикай са акьван фагьумдачир. На лугьумир, абур халкьдин камалдин хазинадин багьа ивирар я кьван.
Яран мисаларни гьакI. Абур чи фольклордин инжияр я. Къурулушдин жигьетдай куьруь, са кьве жумладикай ибарат, гзаф вахтара эхирда рифма аваз, шиирдин къайдада туькIуьрнавай, насигьатар квай чи бубайрин мисалар агъзур йисара арадал атанвай, акьулдивни камалдив диганвай мецин эсерар я.
Играми редакция! За квез бубайривай ван хьана кхьенвай Яран мисалар ракъурзава. Къуй абур кIелзавайбурун гегьенш къатаризни чир хьурай.
Яран ялавар – жегьилрин гьунарар.
Яран каша атIудач, атIайтIани кьатIудач.
Яр гатфарив, Алкьвар – марфарив.
Яран къвайи югъ кьуьд я, алахьай югъ гатфар.
Яран цIаяр ярубур, яран цуьквер – цIарубур.
Яран кар – лежбердин тIвар.
Яран эквервал – сусан иервал.
Яр ава – гатфар ава.
Яран са югъ вири Алкьвардихъ гала.
Яраз цавай яру стIални ават тавурай.
Яр Яран сувариз хкяда.
Яран сувар ялаври иерда.
Яра атIайди хъижеда, фитнеди атIайди ваъ.
Яран гар хару жеда, яран свас – кьару.
Яраз – ярам, гатуз хурам.
Яран гьава – чандиз жафа.
Яран къадир авайдаз таран къадирни жеда.
ХъуьтIуь девлетлуяр, яра кесибар шадарда.
Яран сусал яр жеда, яран тарал зар.
ХъуьтIуьн тIвар залан я, яран тIвар кIубан.
Яраз гъилихъ яру гъал акалда.
Яран Рагъ кьилелай кими тахьурай.
ХъуьтIуьн къаяр патандаз, яран цIаяр жувандаз.
