АКЪВАЗА!
Зи гуьруьшдиз къвервал я яр,
Гар, минет хьуй, акъваза!
Вучиз къвазва цаварай хар,
Хар, минет хьуй, акъваза!
Зи ван хьана атӀана хар,
Секин хьана къарагъай гар,
Вун цавариз чукӀуриз зар,
Варз, минет хьуй, акъваза!
Варз хъфизва, чидач вучиз,
Зи мурадни умуд пучиз.
Лаз хъуьрезва закай хъачиз,
Лаз, минет хьуй, акъваза!
Гьатна хура дидардин цӀун,
Чан гуда за рикӀеваз вун.
Ваз такурай рекьирла зун,
Яр, минет хьуй, акъваза!
САМУРДИН ГЪАМ
Пад-пад хьайи ватандин цӀугъ,
Вун къеневай зи рикӀин чӀух.
Агь, зи кӀвачел хьанва гилтӀам
Самурдин дерт, Самурдин гъам!
Рагъ чуьнуьхай циферин хъен,
На кӀармашна канва зи къен!
КӀариз кӀан яз гардандин цам
Самурдин дерт, Самурдин гъам!
Йифен ахвар, йикъан кьарай,
Цавара зи руьгьдин гьарай,
На авунва рикӀе хъалхъам
Самурдин дерт, Самурдин гъам!
Атунвай зи дерт жез къати,
Тежез завай ви дерт кьатӀиз,
Ийидани уьмуьр гьарам
Самурдин дерт, Самурдин гъам!
Ви кьеряй зун хьана суьргуьн,
Кутаз тежез гъамуник къуьн
АмукьдатӀа?! А виле цӀам
Самурдин дерт, Самурдин гъам!
На дердер заз гайитӀани,
Зун гъамари кайитӀани,
Эхиз тежез кьейитӀани,
Жедач вавай зун ийиз рам
Самурдин дерт, Самурдин гъам!
ЯЛГЪУЗВАЛ
Жув месеваз, вил ракӀарал,
ВандатӀа къе зенгини?
АламатӀа зун рикӀерал,
Зи рикӀ гала дингиник!
Гатазва зи хиялри физ
Вах-стхадин дакӀар... Агь!...
КъведатӀа къе сад зи кӀвализ
Ахъайиз и ракӀар агь!
Хва гъурбатда... АгакьдатӀа
Весидиз яб гудайвал.
Рушалай зи алакьдатӀа,
Сиве хупӀ яд цудайвал?!
ЗатӀни амач цла-чиле –
И кӀвал рикӀиз хушардай...
Касни авач уьцӀей кӀвале –
Са герен рикӀ бушардай.
Экверни кваз тӀимил хьанва.
ВацӀара яд амачтӀа?
Белки эквни зун хьиз канваз,
Куникай дад амачтӀа?!
КьатӀузва за, зи гьални къе
Накьандилай яваш я.
Кьадай хьиз я зи чӀални къе,
Тан кайди хьиз кӀармаш я.
“ТӀакь-тӀакь», “тӀакь-тӀакь» -
къвезва ванер.
Гатазвайди рак ятӀа?
Зенгинин ван!...Юзаз чене,
Зурзазва зун... ГьакӀ ятӀа?!
Гъил вегьизва... Агь зи гъилик
Акатайди сят я.
ТӀакь-тӀакь ийиз физвай вилик,
Зенгайди и баят я!...
Амазма зун кватнаваз гъил,
Атунвай жез гьал харапӀ.
Мад ракӀара акӀурна вил,
ГатадатӀа рак яраб?!
