Веледов Энжем Азеран хва 1986-йисан 24-июлдиз Азербайжан Республикадин КцIар райондин Манкъулидхуьре дидедиз хьана. Ана юкьван мектеб акьалтIарна, «Азербайжан» университетдин фармацевтика факультетда кIелна. Алай вахтунда ада КцIар шегьердин «Зейтун» аптекда кIвалахзава.
Атанач
Рагъ акӏана, мад йиф хьана
Гъетер цавуз илиф хьана,
Варзни хъуьрез элциф хьана,
Зи кlаниди атанач.
Вилив хвена къведа лугьуз,
Садаз таквар секин чӏавуз,
Жув къекъвена виниз-агъуз,
Зи кlаниди атанач.
Мад вилерай юргъар къвана,
Мад гьиссери муркlар кьуна,
Ингье мад зун рекьел туна,
Зи кlаниди атанач.
Гъугъван я зун
Гъугъван я зун и дуьнядин крариз,
Дагъдин къван хьиз залан тир,
Рикӏ атlана, гуьгьуьл хазвай гафариз.
Гъугъван я зун и дуьнядин крариз,
Къуьрен рикӏ кваз, тӏвар аслан тир,
Папан хъендихъ чуьнуьх жезвай ксариз.
Гъугъван я зун и дуьнядин крариз,
Кӏукӏушар сув кьван къакъан тир,
Емиш тагуз, яд хъваз авай тарариз.
Гъугъван я зун и дуьнядин крариз
Рикl сефил яз, икӏ пашман тир,
Завай шиир кхьиз тахьай йикъариз.
КIани яр
Гатфарихъди акъатай шагьвар хьтин,
Женнет багъдиз ахъа жезвай вар хьтин,
Ашкъид тарцел чранавай бар хьтин,
Чи дагъларин кьуьд ятlа вун, кIани яр.
Лацу чиниз нурар гузвай а тIехвер,
Яр янавай цавар хьтин мили хъвер,
Ам гайидаз шукур хьуй икьван иер,
Чи дагъларин къвед ятlа вун, кIани яр.
Вун патав гваз куьз герек я заз лукьман,
А ви кIуьгьуь гафар дердиниз дарман,
Зи уьмуьрдиз жедани лагь, вун мугьман,
Чи дагъларин гад ятlа вун, кIани яр.
Тӏигьиржал
Хтана зун ватандиз,
Жуван хайи макандиз,
Къуват гана зи тандиз,
Валай масанд ава жал!?
Бубад ватан Тӏигьиржал
Яргъара тир зун сефил,
Шад ая на зи гуьгьуьл,
Ви накьвадал тан за кьил,
Валай масанд ава жал!?
Бубад ватан Тӏигьиржал.
Къекъвез кьакьан сувара,
Лекь хьана зун цавара,
Девирдин сур чӏавара
Валай масанд авай жал!?
Бубад ватан Тӏигьиржал!
