Къарабагъдин рикl тир Шушада эхиримжи гъилера 1990 - йисуз хьанай зун. Республикадин парламентдин газетдин векил хьиз ина кам-камуна аваз къекъвенай, тарихдихъ галаз алакъалу тир чкайриз килигнай, къени инсанрихъ галаз ихтилатар авунай. А чlавуз нин акьулдиз къведай хьи, Азербайжандин руьгьдин дамах тир и иер макандихъ чун цlигел яз амукьдай вахтар алукьда? Нин  фикирдиз къведай хьи, са суфрадал фу тlуьнвай къуншидикай душман жеда, темягьвал авуна ви кlвал вавай къакъудда? 

   Вичин бине 1752-йисуз Къарабагъдин гьаким хьайи Панагьали ханди кутур, иер архитектурадалди тафаватлу тир, тlвар-ван авай ксаралди сейли хьайи  и кlеле-шегьер 1992-йисан 8-майдиз эрменийрин яракьлу къуватри кьуна, чпин пацук кутурла чи республикадин агьалийриз гьикьван пис таъсирнайтlа зи рикlелай садрани алатдач. Им Азербайжандин тарихда виридалайни залан чlавар тир. 
Ингье 44 йикъан Ватандин Дяведин вахтунда  чи яракьлу къуватри 2020-йисан 8-майдиз Шуша азад авуна. Гьа юкъуз чи республикадин агьалийрин гъвечlи-чlехид вири шехьзавай. Ибур хвешивилин накъвар тир. Гьа югъ Гъалибвилин югъ хьиз чи халкьдин тарихда гьатна.

   Са шумуд югъ инлай вилик, 35 йис алатайдалай кьулухъ Шуша цlийи кьилелай ахкван заз кьисмет хьана. Ина зун дяведин туькьуьлвилер квай чlуру гелерихъ галаз санал кцlарви кьегьалар Тегьран Менсимованни Решад Асланован, гьакlни Азербайжандин вишералди игитрин гелерихъни гелкъвена.
Шушадал душманри гзаф хирер авунва. Ятlани ам вичел хквезва. Ина республикадин гьукуматди кьиле тухузвай зурба крарай аквазвайвал, Шуша виликандалай иер жеда.