«Самур» газетдин чlехи дуст тир, гьеле институтда кlелдай чlавалай чи газетдин чинриз марагълу макъалаяр акъудзавай Судья Манчарова садра чаз Лезги Бегьлул лакlабдалди шиирар кхьизвай вичин са хуьруьнвидин алакьунрикай ихтилатнай. Мектебда урус ва лезги чlалан тарсар гузвай, дидед чlал аялриз рикlяй кlанарзавай и инсандикай ам акьван рикl алаз раханай хьи, зун и шаирдин суракьда аваз Кцlар райондин Зинданмуругь хуьруьз рекье гьатнай. Инин мектебда Лезги Бегьлулахъ галаз мукьувай таниш хьанай, адан шииррай жегьил муаллимдин дуьньякьатlунарни уьмуьрдикай веревирдер чир хьанай.
Зун гъавурда акьунай хьи, гзафбуруз гьахъ кlани, чlуру краринни къаларин акси тир инсан хьиз чидай ада 1970-йисалай гъиле къелем кьунвайтlани, садбуру хьиз вичин шиирар чапдай акъудун патал газетринни журналрин редакцийрин ракlарар гатазвач. Гьавиляй гзаф йисара дустарилайни хуьруьнбурулай гьейри адан кхьинрикай садазни хабар хьанач.
Бакудиз хтайла за “Самур” газетдин кlелдайбуруз ихьтин са шаир авайди чирнай. Адан чlалар са шумудра газетдин чинриз, гьакlни 2000-йисуз “Самур” газетдин редакцияди туькlуьрай “Акъата шегьредиз” кlватlалдиз акъуднай. Гуьгьуьнлай Лезги Бегьлулан шиирар “Лезги газетдиз”,“КцIар” газетдиз, “ЧиРагъ” ва “Алам” журналриз акъатнай.
Къелемэгьлидин ’’Мулдин цуьк” тlвар алай сад лагьай ктабдикни редакторди хьиз за жуван пай кутунай. И ктабда Лезги Бегьлулан чара-чара йисара къелемдиз къачунвай шиирар ва “Ирид стха” поэма гьатнава. Абуру шаирдин алакьунрикай, адахъ вичиз махсус поэзия авайдакай хабар гузва. Хайи чилни ватан кlанарзавай, дидед чlалалди дамахзавай, къени къилихрин ватанэгьлияр теснифзавай, хийирлу крарихъ ялзавай, чlуру къилихар негьзавай, жегьилар тербия ийиз алахъзавай шаирдин къени гьиссералди диганвай и ктаб кlелдайбурун рикlяй хьанай. Бакудин «Зия Нурлан» чапханада 2008-йисуз басма хьайи и ктаб чиниз акъуддай мярекат чна санал шаирдин хайи хуьре гурлудаказ кьиле тухванай. Адан хизанди, муаллим юлдашри, хуьруьн вилик-кьилик квай ксари, кцlарви къелемэгьлийри шаирдиз поэзиядин четин рекье цlийи агалкьунар тlалабнай.
Дуьньядиз шаир яз атанвай, ялавлу ва женгчи гьиссерин, къени къилихрин и инсандихъ вичин махсус дуьнья авай. Верцlи хиялрин, чlехи мурадрин луваррал алаз цlар ягьидай ада хайи хуьрелай. Кьакьанрай килигдай хайи чилиз. Гзафбуру кьатlузвачир затlарикай фагьумдай.
Тlебиатдал ашукь тир Лезги Бегьлулан шаир хиялар тамара, чуьллера, сувара къекъведай, цуькверив, векьерив, тарарив, къушарив рахадай. Суалри басрух гайила, инсанар вичихъ агъун тавурла, четинвилерини дарвилери кlевера турла, гьахъсузвилерал дуьшуьш хьайила, гурлу гьиссер хура гьакь тавурла илгьамдин булах ргаз, гъиле къелем кьадай ада, шиирри цуьк акъуддай шаирдин.
Тlебиатдин къужахда хьиз санани секинвал жагьидачир адаз. Гатфарилай гатlунна хъуьтlуьн къаяр алукьдалди инсанрин гел авачир чкайрай - дагъларин чархарилай, тамарин деринрай цуьквер, векьер, дувулар кlватlдай, абурукай мелгьемар гьазурна, начагъ ксар сагъардай. Гьавиляй Бегьлул анжах муаллим хьиз ваъ, лукьман хьизни сейли тир.
«Самурдал» гзафни-гзаф рикl алай, адан таъсиб чlугвазвай Лезги Бегьлулан макъалаярни газетдин чинриз акъатзавай. Ада хайи хуьруьн тарихдикай, тIебиатдикай, хийирлу крарихъ гелкъвезвай инсанрикай кхьидай, редакциядиз фольклордин чешнеяр ракъурдай.
Лезги Бегьлул (Ибрагьимов Пагьливан Къарабеган хва) l955-йисан 28-сентябрдиз Кцlар райондин Зинданмуругъ хуьре дидедиз хьана.
Адан чlехи буба Бухсая вичин хциз Пагьливан тlвар ганай. Вичин l5 йис хьайила гада рагьметдиз фенай. Ахпа и тlвар чlехи бубади хтулдиз ганай. Амма уьмуьрдин эхирдал кьван адавай и тlвар кьуна эвериз хьаначир. Гьавиляй гзафбуруз ам Бегьлул хьиз чидай. “Лезги” адан лакlаб тир.
Бегьлулан чlехи буба Бухсайни баде Бафта тlвар-ван авай хизанрин веледар тир. Кьведра - Ватандин Чlехи дяведилай вилик ва гуьгъуьниз хуьруьн колхоздиз регьбервал гайи и итим l937- йисуз репрессиядик акатнай. Бафтади вичин итимдал са тахсирни алачирди субутун патал цlийи кьилелай адан суд ийиз тунай ва гъуьлуьн тlвар михьидиз акъуднай. “Фу гудай инсанар тир, суруз нур кьурай абурун”, - лугьуда хуьруьнбуру и хизандикай гаф кватайла.
Дуьзвал, михьивал, гьахъ, таъсиб чlугван, жуван халкьдиз икрам авун хайибурувай чирнай Бегьлула. Адан буба Къарабег муаллим тир. Диде Мейрам баядрин устад хьизни лукьман хьиз сейли хьанай. И рекьяй Бегьлула гьабурухъ ялнай.
l962-йисуз мектебдиз фейи Бегьлула l970-йисуз 8-синиф кьилиз акъудна къунши Уьнуьгъ хуьруьн юкьван мектебда кlелун давамарнай. Украинадин Днепродзержинск ва Николаев шегьерра аскервал авуна ватандиз хтайла ам Бакудин Кешле заводда фялевиле кlвалахал акъвазнай. l977-йисуз Бегьлул Азербайжандин Къецепатан Чlаларин Институтдик экечlнай. l979-йисуз Четкуьнрин хуьре муаллимвал авур ам, са йисалай хайи хуьруьз хтанай ва вичин уьмуьрдин эхирдалди Зинданмуругърин юкьван мектебда кlвалахнай.
Шаирди вичин кьвед лагьай шииррин ктаб чапдиз гьазурзавай. А ктабда адан цIийи шиирар ва поэмаяр гьатна кlанзавай. Абурукай са кьадарбур чна чи газетдин чинризни акъуднай. Гьайиф къведай кар ам я хьи, Лезги Бегьлулавай а кIватIал басма ийиз хьанач. 2021-йисуз адан уьмуьр вахтсуз кьатl хьана. И хабарди чи рикlер къарсурна. Вучиз лагьайтlа дуьньядилай са рикl къени, мурадар михьи инсан, дидед чlалал кхьизвай са шаир, дуьньядихъ вил кумай хъсан дуст фена. Чун чlалахъ я хьи, шаир кIани хуьруьнбуру адан ктаб чапдай акъуд тавуна тач. Лезги Бегьлулан экуь къамат ам чидай инсанрин рикlера амукьда. Аллагьди рагьмет авурай!
