Лезги бицlекри дидед чlалал мультфильмдиз гьикьван рикI алаз килигдатlа фикир ганани куьне? Ахьтин фильмди дидед чlал тийижир аяларни чпихъ ялда. Абуру мягьтелвилелди, пагь атlанваз мультфильм чпин руьгьдиз кужумардайла чlехибурук руьгь акатда. Эхь, им гзафни-гзаф рикl ахъайдай, лувар акатдай кар я. Вуч хъсан я хьи, чи гележегдикай фагьумна аялар патал акьуллу проектар кьилиз акъудзавай лезги жегьилар арадиз атанва. И рекьяй «Леки» фондуни тухузвай крар иллаки рикIелай тефирбур я. 2016-йисалай инихъ и фондуни шумудни са мультфильм лезги чlалаз таржума авуна дидед чlалал рахурзава. И карда мукьувай иштиракзавайбурун тlварар гьуьрметдивди кьаз кlанзава чаз. Ингье абур: Омар Къазиханов, Асрет Ибилкьасумов, Вагьид Наврузбегов, Радмила Гьажибалаева, Эфрат Рамазанов, Рашид Гьасратов, Камила Шерифова, Мегьамедрасул Садыкъов, Куругъли Ферзалиев, Эмран Гьусейнов, Нарима Агьмедова, Назим Дашдемиров, Али Адилов, Руслан Мегьдиханов.
Къедалди 30 мультфильм аялрин ихтиярда вуганва. Дидед чlалал рикl алай чи ватанэгьлийривай тlалабун ам я хьи, агъадихъ ганвай линкдал илисна ана авай гьар са мультфильм мукьвал-мукьвал чпин аялриз къалуррай. Са чlавуз галайвал тавуна чпин веледриз дидед чlал чир тавур диде-бубайрини къайгъуни гьа фильмри чпин хивез къачуда. Ша и кардал хьайитlани чна кагьулвал тийин. Чи дидед чlалаз икьван икрам ийизвай, и къени проектдин винел датIана кlвалахзавай жегьилриз лагьайтlа, чна рикlин сидкьидай баркалла лугьузва.
