Алай йисан 8-октябрдиз Бакуда «Лезги чlалан клубдин» сад лагьай мярекат кьиле фена. Ина лезги чlалан таъсиб чlугвазвай, дидед чlалал кlел-кхьин чириз кlанзавай 40-дав агакьна чи ватанэгьлияр кlватl хьана. Клубдин регьбер, «Самур» газетдин редактор Седакъет Керимовади цlийи кlватlал вичин карда гьихьтин къетlенвилералди тафаватлу жедатlа кlватl хьанвайбуруз малумат гана ва атанвайбур сад-садахъ галаз танишарна. Ахпа ада клубдин программадикай чирвилер гана. Газетдин редактордин заместитель Муьзеффер Меликмамедова газетдин журналист, жегьил кхьираг Азизрин Севдади, мухбир Анна Гьасанбеговади, жегьил шаир Эфсер Абдуллаева ва масабуру клубдиз агалкьунар тlалабна.

Рикl ахъайдай кар ам тир хьи, мярекатдиз атанвайбурун арада мектебдин аялар, студентар, жегьилар, юкьван яшарин инсанар, пенсионерарни авай. Алисман Муслимова, Мегьди Меликова, Рамазан Алиева, Седакъет Абдулкеримовади, Светлана Сеферовади, Айбенез Османовади, Илкин Пашаева, Мурад Фетиева, Турал Халилова, Рауф Багъирова ва масабуру клубдихъ авсиятда чпин фикирар ачухарна.

С.Керимовади чи алфавитдикай, адан гьарфарикай малумат гайидалай кьулухъ вири сад хьиз чайдин суфрадихъ ацукьна. Ина лезги чlалал верцlи ихтилатар кьиле фена. Ахпа клубда диктант кьиле тухвана. Муьзеффер Меликмамедова фасагьатдиз кlелай текст вирида сад хьиз кхьена. Эхирдай вирибур клубдин мярекатар вацра кьведра, гьяддин йикъара тухунин меслятдал атана, гзафбуру санал шикил ягъана.