Йиса садра дуьньядин лезгийри хайи чlалаз чпин кlанивал къалурда. Чара-чара уьлквейра уьмуьр гьалзавай чи хайибур санал кlватl хьана диктант кхьинив эгечlда. Гзаф йисар я и мярекатди лезгияр агудиз, абурун рикlе дидед чlалаз муьгьуьббатдин цlелхемар куькlуьриз.
Гзаф йисар я «Самур» газетдин кIвалахдаррини и кардик чпин къуьн кутаз. Кьилин редактор Седакъет Керимова кьиле аваз абуру кьиле тухузвай мярекатри чи ватанэгьлияр aгудунин, абуруз чи чIалан кьетIенвилер мукьувай чирунин карда чIехи роль къугъвазва. Гьар йисуз редакциядин коллективдин регьбервилик кваз Бакуда лезги чIалал санал диктант кхьин ихьтин мярекатрикай я.
И гъилерани диктант кхьиз «Самур» газетдал рикI алай кIелдайбур агатнавай. КцIарай атанвай Менсуре Хейировади межлисдин дережа артухарнавай. Редакцияда кIватI хьанвайбуру Азербайжандин гзаф районра яшамиш жезвай лезгийрикай веревирдер ийиз тазвай. Вич Огъуздин Къарабулах хуьряй тир жегьил шаир Эфсер Абдуллаева, Къебеледай тир филолог-шаир Решад Магьмудова, Исмаиллыдин Къалажух хуьряй тир студентар Уьлкер Гьажиева, Нигяр Аббасова ва маса масабуру чара-чара районрин лезгийрин векилри хьиз иштиракзавай.
И гъилера диктант «Самур» газетдин кlвалахдар, лезги чlалал гзаф рикl алай жегьил кхьираг, вичин махарин кьве ктаб чапдай акъуднавай Азизрин Севдади лагьана.
Диктант кхьизвайбурун жергеда «Самур» Лезги Милли Медени Меркездин кьил Имран Рзаевни авай. Бакудай мярекатдик «Самур» газетдин кIеви дустар Роза Гьажимурадова, Эльмара Гьажикеримова, Эдвик Гьасанан, Тагьир Агъарагьимов, Асиф Салманов, Абдулгьамид Несруллаев ва масабурни агатнавай.
Рикl шадардай кар ам тир хьи, и гъилера мярекатдик онлайндалди эгечlнавайбурни авай. Абурукай са шумуд кас Кцlарай тир. Жегьил шаир Эсмира Хуьрелни абурун жергеда авай. Гьар йисуз чахъ галаз санал диктант кхьей кьве вах – Садия ва Селей Несруллаеваяр и гъилера чахъ къецепетай- сад Китайдай, муькуьди Кореядай онлайндалди эгечlнай.Ихьтинбурун кьадар санлай 30-далай гзаф тир.
Дидед чIалаз кIанивални вафалувал къалуриз атанвайбуру диктант кхьейдалай гуьгъуьниз санал кIватI хьун ширринни манийрин мярекатдиз элкъуьрна. Чlалан мел къвердавай гурлу хьана ва яргъалди давамна. Вирида санал лугьузвай халкьдин манийри атанвайбур гзаф шадарна, жегьилрик руьгь кутуна. Роза Гьажимурадовадини Мансура Хейировади кьилди лагьай халкьдин манияр, Асиф Салманова хуралай кIелай лезги шаиррин шиирар рикIел аламукьдайбур хьана. Эфсер Абдуллаева «Къайи рагъ» фильмдай Яргунатан мани кlелайла вирида хордив адаз куьмек гана.
Мярекатдиз атанвайбуру лезги бендерални илигна ва «Сад за лугьун, сад вуна лагь» гафаралди кьил кутуна халкьдин цIудралди чIалар рикIел хкана. Мярекат акьван гурлуз кьиле фена хьи, хъфидайла вирибуру сад хьиз лугьузвай: «Ихьтин мярекатар фад-фад хьанайтIа, хъсан тир».
