И йикъара Бакудин “Red N Line” ММС чапханади тIвар-ван авай шаир-журналист Муьзеффер Меликмамедова эхиримжи йисара азербайжан чIалал къелемдиз къачунвай шииррикайни поэмайрикай туькIуьрна, «Зи рикIин гафарин тIал» тIвар ганвай ктаб чапдай акъудна. Автордин 28 лагьай ктаб тир и кIватIалда дуьньядин, ватандин, халкьдин дердийрикай веревирдер ийизвай философиядин шиирар, Къарабагъдин дяведиз талукьарнавай поэмаяр гьатнава.

Шаирди кьилди вад темадикай веревирдер ийизва: дуьнья авай гьалар, тIебиат ва инсанар, лезги тIвар ва къилихар хуьн, инсанпересвал ва Къарабагъдин дяве. Авторди лезгивал хиве кьазвачир ватанэгьлийрин рикIел чун мерд ва дуьзвал кIани, къадим халкьдин векилар тирди хкизва, абуруз и тIвар хуьх лагьана эвер гузва. М.Меликмамедова «Лугьудай хьи, лезги тир», «Зи гьар дерд са цIар я», «Кьегьалвилин кьин кьадай», «Лугьуда хьи» хьтин шиирар гьеле  2016-йисуз сифте яз «Самур» газетда чап хьайила кIелдайбурун рикI алай чIалариз элкъвенай.

Ктабдин сифте гаф кхьейди ва редактор тIвар-ван авай шаир-журналист Седакъет Керимова я.