КЬИЛЕ ФИДА

  Алай йисан 28-июндиз Азербайжан Республикадин Президент Илгьам Алиева Милли Межлис ахъаюн ва нубатдилай къецяй тир сечкияр кьиле тухун патал серенжемдиз къул чIугунай. Серенжемдив кьадайвал, сечкияр цIинин йисан 1-сентябрдиз кьиле фида. Гзаф партийри чпин векилрин кандидатура къалурнавай сечкийриз СНГ-дай ва маса къецепатан уьлквейрай гуьзет ийидай 300 касдиз теклифнава.

  «Умуд» партиядин седри Икъбал Агъазадеди ва Ватандашвилин Рейсадвилин Партиядин кьил Сабир Руьстемханлыди мад гъилера депутат хьун патал чпин кандидатура къалурнавач. Гьа са вахтунда «ЦIийи Азербайжан» Партиядик квай Васиф Талыбов, Иса Гьабиббейли, Октай Асадов ва Саттар Мегьбалыевни чпин кандитатура къалурнавачирвиляй и гъилера депутат хъижедач.

КАРДИК КУТУНВА

  Чи республикада «Зи михьи уьлкве» тIвар ганвай марафон кардик кутунва. Экологиядин министерстводи арадиз гъанвай и мярекат агьалийрин рикIяй хьанва. И йикъара Сумгаит шегьерда, Исмаиллы, Шеки, КцIар, Хызы ва са кьадар маса районра кьиле тухвай, министерстводин, районрин идарайрин кIвалахдарри, чкадин агьалийри, волонтёрри иштирак авур марафондин вахтунда 3 тонндилай гзаф зирзибил кIватIнава.

  Вири республикадиз талукь тир марафон гьар гьафтедин хемис ва кишдин йикъара кьиле тухуда. Гьуьлуьн ва вацIарин къерехар, тамар зирзибилдикай михьуниз генани мукьувай фикир гуда.

ГЬАЗУРВИЛЕР АКВАЗВА

  ЦIинин йисан ноябрдиз Баку дуьньядин климатдин сиясатдин меркездиз элкъведа. Ина Садхьанвай Миллетрин Тешкилатдин гьава дегиш хьунихъ галаз алакъалу тир конференция (СОР29) кьиле фида. Дуьньядин халкьариз талукь тир и зурба мярекат 11-ноябрдилай 22-ноябрдалди давам жеда.

  Бакуда мярекатдиз гегьеншдаказ гьазурвилер аквазва, гзаф абадвилер кьиле тухузва, куьчеяр, паркар, ял ягъидай вири чкаяр гуьнгуьна хутазва. Шумудни са къецепатан уьлквейрай къвезвай мугьманар хъсандиз кьабулун паталди чи республикадин меркезда герек тир вири жуьредин къулайвилер арадал гъизва.