Яхун жез кIанзаватIа хъуьрехъ

   Британиядин психологри яхун жен патал яцIу инсанриз каш чIугуникай ваъ, хъуьруьникай менфят къачун меслят аквазва. Артух якIар вегьин патал кефияр чIур тавунни кьилин шартIарикай я. Гьавиляй гьар юкъуз гьич тахьайтIа 15 декьикьадин вахтунда рикIяй хъуьрена кIванзава. ИкI хьайила ивиди дамарра хъсандиз гьерекатда, тIуьрбур регьятдиз иливариз жеда. Беденди са акьван калорий кьабулдач.

Къацу чай хъухъ

   Алимри лугьузвайвал, къацу чай хъуни лацу лекь, хук, ратIар азарлувилерикай хуьзва. Къацу чай квал атIудай ва дакIунвал элекьардай антисептикни я. Йикъа садра къацу чай хъвайибуру давленидикай генани тIимил азият чIугвада. Адак квай антиоксидантри кьилин мефтI Альцгеймер синдромдикай ва паркинсонизмдикай хуьзва. Ихьтин чайди гьакIни инсандиз жавандиз амукьиз куьмек гуда.

ЦIийи якIукай чраз

   Гастроентерологри хуьрекар анжах цIийи якIукай чурун меслят аквазва. МуркIада хвейи якIук белок тIимил амукьда. 10 йикъалай артух вахтунда амукьай якIу герек тир вири ферментар квадарда. Ихьтин якIукай менфят къачурбурук хукунин, ратIарин, чIулав лекьин, тIуркIунрин азарлувилер акатда, гьакIни кьилин мефтIедин патологияр арадиз къведа.

Кака неъ

   Дидедин некIедилай алатайла инсанар паталди виридалайни хийирлу тIуьн кака я. Ада рикIин начагъвилер арадай акъудзава. Къиб лагьайтIа, вилерин дарман я. Какади гьакIни ивидик квай шекер са къайдада хуьда. Вичихъ гзаф ракь квай ада организм энергиядалди таъминарда. Идалай гъейри какади мефтIедивни хъсандиз кIвалахиз тада.

Ширинлухар негь ая

   Ширинлухрал рикI алайбур куьк хьунилай гъейри вахтундилай фад кьуьзуьни жеда. ИкI тирди Нидерланддин алимри лугьузва. Ихьтин инсанар азарлувилери генани фад кьада. Кьадардилай артух якIар кьунвай инсанар сагъарун яхунбурув гекъигайла гзаф четин я. Гьавиляй алимри инсанриз ширин затIар жезмай кьван тIимил нен меслят аквазва.

Пуд йикъан къене иер хьухь

   Америкави диетолог Николас Перриконедин меслятдихъ яб акалайтIа, пуд йикъан къене куь хам акваз-акваз иер жеда. Николаса шекерди, кьеле, алкоголди ва кофеди хамуна шуьткьверар твазва, инсан фад кьуьзуь ийизва лугьузва.

   Пуд юкъуз анжах бугъада чранвай балугъ, кака, салан ва багъдин майваяр, къацу набататар, кIерецар, шуьмягъар тIуьр инсандин хам дегиш жеда. И диетадиз 6 гьафтеда амал авуна кIанзава