Дагъустандин Тарихдин, ЧIалан ва Эдебиятдин Институтдин Гъилин ХатIарин Фондунай Саадидин «Гуьлуьстан» эсердин лезги чIалаз элкъуьрнавай, аджамдалди кхьенвай вариант ашкара хьанва. Ам чи чIалаз элкъуьрнавайди ХVII виш йисан шаир Лезги Гьасан я.

Гьасанакай сифте яз малумат гайиди Дагъустандин машгьур алим, тарихдин илимрин доктор, профессор Расул Магомедов я. Ада вичин 1991-йисуз урус чIалал чапдай акъудай «Дагъустандин тарих» ктабдин 111-чина кхьенва: «Рабаданан хва шаир Гьасана 1684-йисуз ХIII виш йисан классик Саадидин машгьур «Гуьлуьстан» эсер лезги чIалаз элкъуьрнава». Алимди кхьизвайвал, Лезги Гьасаназ араб, фарс ва туьрк чIалар дериндай чидай. Адахъ вичи кхьенвай шииррин гъилин хатIарин кьве ктаб авай. Алай вахтунда архиврихъ гелкъвезвай ксари гьа ктабар жагъурзава.