Играми редакция! Чавай Дербентда Азербайжандин телеканалриз регьятдиз килигиз жезва. Гьа и карди чаз алай йисан 10-апрелдиз Ичтимайи Телеканалдай чи тIвар-ван авай къелемэгьли, композитор ва режиссер Седакъет Керимовадин «Ван алачир гьарай» фильмдиз килигдай мумкинвал гана. Чна ада чIугур, лезгийрин сад лагьай художественный фильм тир «Къайи ракъинизни» килигнай. Гаф атай чкадал лугьун. «Къайи рагъ» лугьуз тежедай кьван метлеблу ва таъсирлу фильм я. Ина актеррин къугъунри, чпин игитрин образар ачухунин тегьерди чав дериндай фагьумиз тунай. Гьа са вахтунда фильмда кьиле физвай вакъиайрин халкьлувили, музыкадин кутугайвили вири гьейранарнай ва чна Седакъет ханумдиз рикIин телер юзурдай, вилериз нагъв хъиткьинардай и фильмдай аферин лагьана разивал къалурнай.
Гьа ихьтин гьавада аваз «Ван алачир гьарайдиз» килигна чна. Дагъустандин халкьдин шаир Фейзудин Нагъиеван гафаралди лугьун хьи, Седакъет Керимовади и фильмдалди вич кьетIен хатI авай кинорежиссер тирди мадни мягькемдиз субутна. Им лугьуз тежедай кьван хъсан фильм я. Халисан сенятдин инжи я. ИкI тирди субутзавай делилар садни кьвед туш.
Сад лагьайди, адахъ гзаф важиблу, гьар гьи кхьирагдивай хьайитIани къелемдиз къачуз тежер, инсанриз даим герек тир ахлакьдин тема ава. Фильмдин сценарий кхьенвайди, композитор ва къурулушдин режиссер вич тир Седакъет ханумди и тема акьван устадвилелди, акьван эсерлуз къелемдиз къачунва хьи, килигзавайдаз рикIивай таъсирзава, ам шерзум жезва, жуван хайиди къужахда кьуна «чан диде, за а къадирсуз веледри хьиз ийидач, за вун жуван вилин нинеяр хьиз хуьда» лугьуз кIан жезва. Ина гъалибвилин символ эсердин игит Сарият хала я. Гьикьван кIевера гьатайтIани, ам руьгьдай аватзавач, датIана гъалибвилихъ ялзава. «Завай кIвалах тавуна акъвазиз жедач» лагьана яшлу дишегьлийрихъ галаз санал сал арадиз гъизва, етимрин ризкьида вил кутунвай чуьнуьхгумбатIрихъ галаз женг чIугун патал идарайрин ракIарар гатазва, вичел буьгьтен вегьейла ажузвал къалурзавач, эхирни Сенуберни Теймур вичин веледар хьиз кьабулна хуьруьз хъфиналди кIеверай акъатдай рехъ къалурзава.
«Дидеди атана зун инай хутахда» лугьузвай, авачир дидедин чандал кьин кьазвай Теймуран, ам Сарият халадихъ галаз санал хуьуруьз хъфидайла гьасретдалди адан гуьгъуьна килигзавай етим аялрин килигунри инсандин рикIин гъал атIузва. Гьа са вахтунда музыкади, яргъалай аквазвай кьакьан тарцини килигзавайбуруз таъсирзава.
Авайвал лагьайтIа, и фильмда бубайрин мисалриз элкъведай хьтин камаллу гафарни гзаф ава. Идрис халудин «Гъуьл авачтIа вун етим я», Сарият халадин «Етимрин паюна вил кутамир», «Ажузвал ваъ, кьегьалвал герек я» хьтин мисалар рикIелай тефирбур я. Санлай къачурла фильмда вири вакъиаяр дуьз гармонияда аваз кьиле физва, актеррин къугъунри инсан гьейранарзава. Сагъ хьурай халкьдин багьа эменнидиз элкъвенвай ихьтин фильм арадиз гъанвай Седакъет ханум. Чна адаз чандин сагъвал, мадни чIехи агалкьунар тIалабзава.
