Алай йисан 14-февралдиз Милли Межлисда Азербайжан Республикадин Президент Илгьам Алиеван кьин кьунин мярекат кьиле фена. Мярекатда сад лагьай ханум Мегьрибан Алиевади, гьукуматдин жавабдар къуллугъчийри, Милли Межлисдин депутатри иштиракна.
Азербайжан Республикадин Президент Илгьам Алиева кьин кьадай мярекатдал лагьана: «Къад йисалай гзаф я Азербайжан халкьди заз даяхвал ийиз. 2003-йисуз сад лагьай гъилера зун президентвиле хкягъайла за жуван играми халкьдиз вири везифаяр лайихлудаказ кьилиз акъудда, халкьдин патай авай ихтибарлувал вине кьада лагьана гаф ганай. Алатай йисар агалкьунринни гъалибвилерин йисар хьана. Четинвилерни хьана, гьялна кIанзавай гзаф месэлаярни. Ингье Азербайжан халкь гъуд хьиз сад хьана, четинвилериз килиг тавуна агалкьунралди вилик фена.
2018-йисуз за кьин кьадай вахтунда и трибунадай лагьанай хьи, чна кIвенкIве чи уьлкведин чилерин битаввал таъминарна кIанзава. Азербайжан халкьди садрани вичин чилерал кьвед лагьай эрмени гьукумат арадал атуниз рехъ гудач, вуч кIандатIани хьурай, чна чи хайи чилер азад ийида. Азербайжан халкьди гъуд хьиз сад хьана Ватандин дяведин вахтунда чи чилерин чIехи пай азад авуна. 300-елай гзаф шегьерарни хуьрер азад хъхьана. ГьакIни чна Азербайжандин медениятдин меркез тир Шуша шегьер душмандивай къахчуна. Аллагьди чи вири шегьидриз рагьмет авурай. Чун абурун ва Азербайжандин цIуд агъзурралди жегьилрин кьегьалвал, къагьриманвал себеб яз кье азад Къарабагъда яшамиш жезва. Жуван лайихлувал хуьз алакьай халкьди хьиз инин шегьерарни хуьрер туьхкIуьр хъийизва».
Президентди вичин рахунра виликай къвезмай йисара гьялна кIанзавай месэлайрикайни лагьана. Къарабагъ кIвачел акьалдарун, уьлкведин Яракьлу Къуватар генани гужлу авун кьилин везифайрикай я. Азербайжандин сергьятар хъсандиз хвена кIанзава. Хатасузвилин тедбирар кьиле тухун гзаф важиблу я. Гьейдар Алиеван рехъ инлай кьулухъни датIана давамарда. Жегьил несил ватанпересвилин руьгьда тербия авуниз кьетIен фикир гуда. Уьлкведин санайи ва хуьруьн майишат генани вилик тухуз алахъда.
Азербайжандин къецепатан сиясатдикай гегьеншдиз рахай Президентди кьетIидаказ лагьана: «Неоколонизмдин кьиле акъвазнавайбуруз чир хьун герек я хьи, абур нагьахъ чахъ галаз герек тушир дяведиз экъечIнава. Чун кьулухъ акъвазирвал туш. Чаз къарши авур гьар са гьахъсузвилиз герек тир жаваб гурвал я. Чи уьлкведиз акси яз амалдар планар гьазурзавайбур пашман жеда».
Эхирдай Президентди гилан цIийи девир Азербайжан паталди агалкьунралди гатIуннавайди къейд авуна. ИкI давамарна кIанзава лагьай ада, и рекьяй халкьдиз агалкьунар тIалабна.
