Алай йисан 26-апрелдиз Россиядин Илимрин Академиядин концертдин залда ФЛНКА-дин – лезгийрин 1999-йисуз арадиз атанвай виридалайни чIехи ичтимайи тешкилатдин 25-йисан юбилей гзаф гурлуз кьиле фена. 1200 кас кьазвай, сиви-сивди ацIанвай чIехи залдал Москвадай, гьакIни РФ-дин чара-чара шегьеррай атанвай лезгийри абур гъанвай. Сад-садахъ галаз лезги чIалал рахазвай жуван ватанэгьлияр акурла рикI шадвилин гьиссерив ацIузвай. Ина чпин ярар-дустар, мукьва-кьилияр, хуьруьнвияр акурбурун хвешивилин и кьил а кьил авачир. Чеб Азербайжандин ва Дагъустандин чара-чара пипIерай тир, Москвада бине кутунвай лезгияр шад мярекатдив рикI алаз агатнавай.
Мярекат ФЛНКА арадиз гъана 24 йисуз датIана адаз регьбервал гайи Ариф Керимова ва са йис вилик и тешкилатдин президентвиле хкянавай Васиф Гьасанова ачухарна.
РФ-дин президентдин администрациядин жавабдар кIвалахдар Андрей Ротэрмела, РФ-дин миллетрин крарин агентстводин кьилин заместитель Станислав Бедкина, Дагъустандин милли сиясатдин ва диндин крарин министр Энрик Муслимова, Дагъустандин депутат Марат Бейбалаева, Москвадин милли сиясатдин департаментдин регьбердин заместитель Иван Петрова юбилей мубаракна.
Мярекат журналист, Муз-тв телеканалдин редактор Диана Юзбеговади ва шаир-журналист Владик Батманова давамарна. ФЛНКА-дин виликан регьбер Ариф Керимов, Дагъустандин Халкьдин Собранидин депутат, меценат Имам Яралиев ва Бакуда акъатзавай «Самур» газетдин редактор, шаир-журналист Седакъет Керимова сифте яз ФЛНКА -дин «Лезги халкьдин дамах» медалдиз лайихлу хьана.
Меценатри лезги чIал, эдебият, меденият, илим вилик тухунин карда чешне къалурзавай лезгийриз ФЛНКА-дин «Лезги гъед» премия ва пулунин премияр вугана.
Агъадихъ галай ксар премиядиз лайихлу хьана:
«Лезги газет» дин кьилин редактор, Дагъустан Республикадин лайихлу журналист Мегьамед Ибрагьимов; СтIал Сулейманан тIварцIихъ галай Гьукуматдин Лезги Драм Театрдин директор Динара Эминова; Хийирлу крарин «ЛЕКИ» фондунин кьил Гьасан Гьасанов; РАН-дин Востоковеденидин Институтдин директор, тарихдин илимрин доктор Аликбер Аликберов; Дагъустандин халкьдин шаир Майрудин Бабаханов; Дагъустандин Хив райондин ЦIинит хуьруьн юкьван мектебдин лезги чIалан муаллим Сейфуллагь Шагьмарданов; диндин алим Ямин Гьажи Мегьамедов; Гьажи Давудан тIварцIихъ галай диндинни-маарифдин меркездин кьил Самур Алиев.
Кьилди «Лезгийрин куьлуь гъед» премиядиз Россиядин Сад лагьай каналдин «Лучше всех» гунугда вичин рахунралди вирибурун рикIер рам авур Алиса Къулиевани адан хизан лайихлу хьана. Гьа инал лугьун хьи, ФЛНКА-диз «Лезги гъед» премия гьар йисуз вугудай ният ава.
Юбилейдин концерт Дагъустан Республикадин лайихлу артистар Селим Алагьярованни Алия Ханагьмедовадин, Бакудин «Сувар» ансамблдин солистар Жавагьир Абдуловадинни Эльвина Гьейдаровадин, дагъустанви маничи Рейсан Мегьмедкеримован, «Лезгинка», «Адат», «Самур», «Этнобенд» ансамблрин, гьакIни симин пагьливан Расул Абакарован иштираквилелди кьиле фена.
Мярекат куьтягь жедалди гурлу капари зал юзурна. Концертдин вахтунда фойеда лезги жегьилри кутур демини мярекатдиз кIубанвилинни суварин гьава гъана. Концертдилай вилик кьиле фейи лезги халичайрин выставкади, гьакIни чIугвар Самур Алиеван Гьажи Давудаз талукьарнавай эсеррин выставкади инсанрин рикIер шадарна. Мярекат руьгь кутадайди, вини дережадинди хьана. Ам куьтягь хьайидалай кьулухъни инсанар чикIизвачир, гапIал-гапIал жез чпин хуш гьиссер сад-садав агакьарзавай.
Санлай юбилейдин гьазурвилер акур командади гзафни-гзаф зегьмет чIугунвайди чир жезвай. Волонтерри – лезги жегьил рушарини гадайри мярекатдик пай кутунвай. Сегьнедин декорацияр, мярекат кьилиз акъатдалди чIехи элкрандай къалурай видеодин материалар вини дережадинди, руьгь кутадайди тир. Са гафуналди, галай-галайвал авуна, эд-мелна хъсан мярекат арадиз гъанвай.
Ваз 25 йисан юбилей мубаракрай, ФЛНКА! Мадни чIехи агалкьунар тIалабзава чна ваз!
