Dağıstanın Azərbaycan Respublikasındakı daimi nümayəndəliyinin rəhbəri Əliyar Abdullayevin dəvəti ilə  “Samur” qəzetinin redaktoru, tanınmış yazıçı-jurnalist Sədaqət Kərimova nümayəndəlikdə olmuşdur. Tanışlıq məqsədi daşıyan bu səmimi və işgüzar görüşdə Azərbaycanla Dağıstan arasında əsrlər boyu davam edən mədəni əlaqələrin daha da genişləndirilməsinin, bunun üçün mədəniyyət və idman tədbirlərinin keçirilməsinin vacibliyi qeyd olunmuşdur.
   Dağıstanın rəhbəri Sergey Melikovun iki respublika arasında dostluq əlaqələrinin daha yüksək müstəviyə keçməsində maraqlı olduğunu vurğulayan Əliyar Abdullayev bu ilin yanvar ayından, yəni onun bu vəzifəyə təyin olunduğu vaxtdan indiyə kimi həmin sahədə həyata keçirilən bir sıra maraqlı tədbirlərdən danışdı. Sonra isə yaxın günlərdə Bakının Muğam Mərkəzində Sovet xalqının Böyük Vətən müharibəsində qələbəsinin 80 illiyinə həsr olunmuş “Birliklə qazanılmış qələbə” adlı ədəbi-bədii gecənin keçiriləcəyindən söz saldı.
   Dağıstan Respublikası musiqi kollekivlərinin iştirak edəcəyi həmin musiqili gecədə Azərbaycanın və Əziz Əliyevin rəhbərliyi ilə Dağıstanın Böyük Qələbəyə verdiyu töhfələrdən də bəhs olunacaq.
S.Kərimova nümayəndəlikdə keçirilən görüşdə “Samur” qəzetinin fəaliyyətində Azərbaycan-Dağıstan mədəni əlaqələrinin təbliğinin mühüm yer tutduğunu qeyd etdi.
   Ə.Abdullayev Sədaqət Kərimovanın yaradıcılığı ilə qiyabi tanış olduğunu, nümayəndəliyin fəailiyyətində onun ictimaiyyətlə əlaqələri sahəsindəki təcrübəsindən bəhrələnmək istədiyini bildirdi və qonağa çoxşaxəli yaradıcılığında böyük uğurlar arzuladı.