И мукьвара Магьачкъаладин «Мавел» чапханада басма хьанвай «Баркаллу лезгияр» тӀвар ганвай вичин ктабда Дагъустандин тӀвар-ван авай лезги журналист Куругьли Ферзалиева кьисметди чеб ватандай яргъариз акъуднавай лезгийрикай ихтилатзава. Россиядин чара чара регионра, къецепатан уьлквейра яшамишзаватӀани чпин ватанпересвални викӀегьвал датӀана хуьзвай чи ватанэгьлийрикай адан веревирдер марагълубур я. «Лезги газетда» «Чи ватанэгьлияр - гьар сана» рубрикадик кваз акъатай макъалаяр хушдаказ кьабулай кӀелдайбур Куругьли Ферзалиеван цӀийи ктабдивни рикӀ алаз эгечӀдайдан чӀалахъ я чун.