Алай йисан 15-январдиз лезги жегьилри Бакудин чIехи ресторанрикай сада нубатдин Дем кьиле тухвана. Мярекат арадиз гъайиди «Сувар» ансамблдин кьил Завир Нежефов ва «Джигитар» кьуьлдин группадик квайбур я.

Демина лугьуз тежедай кьван иер макьамар ягъай «Сувар» ансамблдин макьамчияр Заур Мусаеван, Афгъан Жамалуддинован, Дагъустандай эвернавай машгьур «Лезгинка» ансамблдин векилар тир Саид Омарован ва Казбек Караеван алакьунри вири гьейранарна. Абуру ягъай «Лезгинкади» дем иллаки гурлу авуна.

Демина «Сувар» ансамблдин манидарри - Жавагьир Абдуловади, Роза Гьажимурадовади, Эльвина Гьейдаровади, гьакIни КцIарай эвернавай Бегьруз Гьажибегова лагьай лезги манийри мярекатдиз атанвайбур гзаф шадарна.

Мярекат ина кьиле тухвай жуьреба-жуьре конкурсри генани марагълу авуна. Садбуру деминиз иситIа, цикIен, алуга чрана гъанвай. Лезги цIун кIвалин няметри вирибуруз дад гана.

Гьар гъилера ихьтин мярекатриз илифайла, чна икьван къиметлу адетар арадиз гъайи чи бубайринни дидейрин руьгьдиз икрамна кIанзава.