Азербайжандин Милли Консерватория акьалтlарнавай кьве лезги руш къе «Самур» газетдин редакциядиз илифнавай. Кцlарай тир Анеля Низамидин руш Асалиева ва Агъсудай тир Диана Бехтияран руш Ядигарова. Чпихъ чlехи алакьунар авай и жегьилрихъ галаз хъсан са проект кьилиз акъуддай меслятдал атана чун. Проект лезги халкьдин дегь чlаварин макьамрихъ галаз алакъалу я. Азербайжандин Милли Илимрин Академиядин магистратурада кlелзавай, «Истанбул» лицейда фортепианодин муаллимвиле кlвалахзавай Анеля этномузыкади вичихъ ялзава. «Эврика» лицейдин муаллим, вичихъ ванцин гегьенш диапазон авай Дианадиз лагьайтlа, вокалда вичин гаф лугьуз кlанзава. И умун къилихрин рушарихъ галаз ихтилатди чи рикl ахъайна. Проектдиз лезгийрин дегь макьамрихъ галаз мукьувай машгъул жез кlанзавай маса жегьиларни желб авун патал планар туькlуьрна чна.