Вич вириниз сейли хьанвай Баку 2026-йисан «Дуьньядин  спортдин меркез» яз малумарнава. Им дуьшуьшдин кар туш, дуьньядин талукь тешкилатри чи республикада спорт йис-сандивай вилик финиз ганвай лайихлу къимет я.10 йис инлай вилик «Баку-2015» I Европадин Къугъунра чи шегьерди 50 уьлкведин спортсменар кьабулнай. Сифте яз Азербайжанда кьиле тухвай Европадин Къугъунар гзаф хъсандиз кьиле фенай.
   Алай вахтунда республикадин Олимпиядин стадионда, Гьейдар Алиеван тIварцихъ галай чIехи Спортдин Дараматда, Тофик Багьрамован тIварцIихъ галай стадионда, Милли Гимнастикадин Аренада, Бакудин Спортдин Дараматда ва маса комплексра акъажунар вини дережада кьиле тухуни вири дуьньядин фикир желбзава.
   1997-йисалай инихъ Азербайжандин Милли Олимпиядин Комитетдиз регьбервал гузвай Президент Илгьам Алиева датIана республикада спорт вилик тухуниз къайгъу къалурзава, спортдин инфраструктура къвердавай генани хъсанарзава. Хъсан къулайвилер авайвиляй Бакуда «Формула-1», Европадин Къугъунар, Исламдин Рейсадвилин Къугъунар, СНГ-дин Къугъунар ва маса чIехи акъажунар кьиле фена ва республикадин нуфуз хкаж хьана. Баку «Дуьньядин спортдин меркез» яз малумаруни жегьилар спортдив генани мукьувай агудда, и рекьяй чи уьлкведин агалкьунар пара жеда.