Бакудин Ясамал районда авай Кьилин Паркдин давам яз мад пуд куьчедин патарив цIийи парк кутун къарардиз къачунва. Баку Шегьердин Крар Кьилиз Акъудзавай Идарадин табийвилик квай эцигунрин идаради малумат гайивал, цIийи парк кутун паталди 38 миллион манат пулунин такьатар серфна кIанзава.
Алай вахтунда Ясамал райондин куьгьне тарар авай чка абад ийизва. Ина 161 кьуранвай тар авайди малум хьанва. Абур акъудна, чкадал 300 цIийи тинг цада. Бакудин иервал артухарзавай Кьилин Парк 2019-йисуз кардик кутунай. ЦIийи Паркди меркездиз генани гзаф иервал, инсанриз ял ягъидай регьятвал гъида. Ина велосипед гьалун патал рекьер, аялар къугъвадай майданарни жеда. Са гафуналди, цIийи паркда инсанар патал герек тир вири жуьредин къулайвилер арадал гъида.